Քրդական կուսակցությունը պահանջում է «լռեցնել զենքերը»

• 25.08.2015, 19:38
•  Մերձավոր Արևելք,  Աշխարհ

Թուրքիան պատրաստվում է արտահերթ ընտրությունների: Թուրքիայի Սահմանադրության համաձայն երկրի ղեկավարությունը պետք է 5 օրվա ընթացքում ժամանակավոր կառավարություն ձևավորի, սակայն ոչ բոլոր կուսակցություններն են պատրաստ մասնակցել ժամանակավոր կառույցի աշխատանքին: Ժողովրդա-Հանրապետական և Ազգային շարժում կուսակցությունները հայտարարել են, որ մտադիր չեն մասնակցել Արդարություն և զարգացում կուսակցության կողմից ղեկավարվող նման կառավարության գործունեությանը:

Իր հերթին, քրդական Ժողովուրդների դեմոկրատիա կուսակցության համանախագահ Սելահաթթին Դեմիրթաշը հայտարարել է, որ «Թուրքիան այլևս անկարող է կրել շարունակվող սպանությունների ծանրությունը»: Դեմիրթաշը կոչ է արել Թուրքիայի նախագահ Էրդողանին և կառավարությանը անմիջապես «լռեցնել զենքերը»: «Ոչ միայն մենք, այլև ողջ Թուրքիան խաղաղություն է ուզում», - Դեմիրթաշի խոսքերը մեջբերում է թուրքական Hurriyet-ը:

Քրդական կուսակցության համանախագահի կարծիքով կառավարության գործողություների գլխավոր նպատակն է թույլ չտալ քրդական կուսակցությանը հաղթահարել խորհրդարանի 10 տոկոսանոց շեմը, որն անհրաժեշտ է խորհրդարանում պատգամավորական տեղեր զբաղեցնելու համար: «Այս քաոսային քաղաքականությունը պետք է անմիջապես դադարեցվի: Նրանք երկիրը պատերազմի մեջ են ներքաշել և պետք է  պատասխանատվություն կրեն դրա համար: Մեր խնդիրը հիմա զենքերը լռեցնելն է»,- լրագրողներին ասել է Դեմիրթաշը:

Միաժամանակ նա հայտարարել է, որ իր կուսակցությունը պատրաստ է մասնակցել ժամանակավոր կառավարության աշխատանքին, սակայն «նա չի զարմանա, եթե վարչապետը փորձի նման կառավարություն ձևավորել առանց քրդական կուսակցության մասնակցության»: Դեմիրթաշը նշել է, որ իր կուսակցության բոլոր պատգամավորներն էլ նախարարական պաշտոններ զբաղեցնելու իրավունք ունեն: Նա նաև զգուշացրել է, որ քրդական կուսակցությունը պատրաստ է պատասխան քայլեր ձեռնարկել, եթե հանկարծ Թուրքիայի վարչապետ Դավութօղլուն «խախտի Սահմանադրությունը և փորձի կառավարություն ձևավորել առանց քրդական կուսակցության մասնակցության»:

Նա նաև հավելել է, որ ցանկացած նախարարության կազմում պետք է կանայք լինեն: «Թուրքիայի բնակչության կեսը կանայք են: Հետևաբար, կառավարության կեսը պետք է կազմված լինի կանանցից», - ասել է Դեմիրթաշը: Նշենք, որ խորհրդարան անցած 32 կին պատգամավորների մեծ մասը հենց քրդական կուսակցությունից են: