Հայաստա՛ն, երկրպագում ենք քեզ

Մենամարտում ևս մեկ մեդալ նվաճեց Արման Երեմյանը: Թեքվոնդոյի Եվրոպայի առաջնությանը 80 կիլոգրամ քաշային կարգում նա Հայաստան բերեց արծաթե մեդալը:

Հայաստանի հաղթանակներում իր ներդրումն ունեցավ նաև արցախցի մարզիկը: Խաբարովսկում կյոկուշին կարատեի աշխարհի առաջնությանը Հայաստանը ներկայացնող արցախցի մարզիկ Արթուր Հարությունյանը, եզրափակչում հաղթելով Ղազախստանի ներկայացուցչին, 60 կիլոգրամ քաշային կարգում նվաճեց աշխարհի չեմպիոնի տիտղոսը:

Սամբիստները ևս ուրախացրին իրենց հաղթանակներով: Տիգրան Կիրակոսյանը 52 կիլոգրամ քաշային կարգում Խորվաթիայում դարձավ Եվրոպայի չեմպիոն և աշխարհի փոխ-չեմպիոն Մարոկկոյի Կասաբլանկա քաղաքում: Իսկ Մաքսիմ Մանուկյանը դարձավ Եվրոպայի առաջնության բրոնզե մեդալակիր:

Հայ ծանրամարտիկներն ավանդաբար հայտնի են իրենց հաղթանակներով: Թբիլիսիում Եվրոպայի առաջնության ժամանակ 77 կիլոգրամ քաշային կարգում Տիգրան Մարտիրոսյանը դարձավ Եվրոպայի չեմպիոն: Մարտիրոսյանի համար սա արդեն եվրոպական երրորդ ոսկին է: Փորձառու մարզիկն ավելի վաղ դարձել է աշխարհի չեմպիոն, ինչպես նաև Օլիմպիական խաղերի բրոնզե մեդալակիր է: Եվրոպայի առաջնության բրոնզե մեդալակիրը նույնպես հայ է` Անդրանիկ Կարապետյանը:

Հատկապես ցանկալի է նշել հայ մարմնամարզիկների հաջողությունների մասին: Թեև մենք դեռ ոսկի չունենք, սակայն Գլազգոյում սպորտային մարմնամարզության աշխարհի առաջնությանը նժույգթափեր վարժությունում Հարություն Մերդինյանի նվաճած բրոնզը Հայաստանի համար շատ կարևոր հաղթանակ էր: Հիշեցնենք, որ այս տարի Մերդինյանը նվաճեց Եվրոպայի առաջնության արծաթե մեդալը: Աշխարհի առաջնության ժամանակ նվաճած մեդալի շնորհիվ նա իր համար ուղեգիր ապահովեց Ռիո Դե Ժանեյրոյում կայանալիք Օլիմպիական խաղերին:

Միջազգային հարթակներում հաջողությամբ հանդես են գալիս նաև այլ հայ մարզիկներ, այդ թվում Արթուր Դավթյանը և Արթուր Թովմասյանը:

2015 թվականին հայ բռնցքամարտիկները երկրպագուներին այնքան էլ հաճախ չեն ուրախացրել: Կարելի է հիշատակել Եվրոպայի առաջնությանը Արամ Ավագյանի նվաճած բրոնզե մեդալը: Սակայն միլիոնավոր հայերի սրտերն ուրախությամբ լցվեցին ԱրթուրԱբրահամի հաղթանակի շնորհիվ: Գերմանական Հալլե քաղաքի "Gerry Weber Stadium"-ում կայացավ Արթուր Աբրահամի և Ռոբերտ Շտիգլիցի մենամարտը: 35-ամյա Արթուր Աբրահամը 6-րդ տուրում նոկաուտի ենթարկեց 34-ամյա Ռոբերտ Շտիգլիցին: Եվս մեկ հաղթանակ Աբրահամը գրանցեց գերմանական Հաննովեր քաղաքում` հաղթելով 33-ամյա բրիտանացի Մարտին Մարեյին: Եվ թեկուզ Արթուրը չի կռվում Հայաստանի դրոշի ներքո̦ բայց մենք հո գիտենք… և ոչ միայն մենք:

Անսպասելի էր առագաստանավային սպորտում Միշել Զաքարյանի և Ջերեմի Իալենտի հաղթանակը: Ֆրանսիական Կարնակ քաղաքում անցկացված առագաստանավային սպորտի կատամարան դասի աշխարհի առաջնությունում չեմպիոնի տիտղոսը նվաճեցին Հայաստանը ներկայացնող Միշել Զաքարյան և Ջերեմի Իալենտի զույգը: Առաջնությանը մասնակցում էին 15 երկրների մարզիկներ:

Սովոր լինելով հայ շախմատիստների հաղթանակներին` մենք տխրում ենք նրանց յուրաքանչյուր անհաջողության համար: Եվ թեև հայ շախմատիստներին այս տարի չհաջողվեց ոսկե մեդալ գրավել, սակայն Հայաստանի տղամարդկանց հավաքականը դարձավ Եվրոպայի շախմատի խմբային առաջնության փոխչեմպիոն և գրավեց աշխարհի առաջնության բրոնզը: Սա ևս բարձր արդյունք է: Հայաստանի հավաքականի ավագ Լևոն Արոնյանը դարձավ ամերիկյան Սենտ Լուիսում տեղի ունեցող Sinquefield Cup շախմատային մրցաշարի հաղթող: Իսկ Հրանտ Մելքումյանը Մինսկում դարձավ արագ շախմատի Եվրոպայի առաջնության փոխչեմպիոն: