6-ից հետո հաց չուտելն իրականում կարծրատիպ է. ֆիթնես մարզիչ

• 13.06.2016, 22:03
•  No-politics,  Հարցազրույց

Պետք է սնվել բավական հաճախ և փոքր չափաբաժիններով: Իսկ ամենակարևորը ճիշտ սնունդն օգտագործելն է։ Այս մասին «Արմեդիա» ՏՎԳ հետ զրույցում ասել է սպորտսմեն, ֆիթնես մարզիչ, կենսաբանական գիտությունների թեկնածու Հովհաննես Ավագյանը:

«Ցելյուլիտից ազատվելու լավագույն տարբերակը կարդիովարժություններ անելն է և ուժային վարժությունների հետ դրանք համակցելը: Դա ունի ինչպես կանխարգելիչ նշանակություն ցելյուլիտի առաջացման համար, այնպես էլ ուղղված է արդեն իսկ եղած խնդիրը վերացնելուն»,- ասել է մարզիչը: Միաժամանակ, նա ընդգծել է, որ  այս բոլոր ֆիզիկական վարժությունների արդյունավետությունը, կամ ՕԳԳ-ն շատ չնչին կլինի, եթե դրանք չուղեկցվեն համապատասխան դիետայով:

Ընդհանրապես, մեր ամենօրյա սննդակարգի  30%-ը  պետք է կազմեն պրոտեինները,  60%-ը՝ ածխաջրերը (որոնցից 80% բարդ ածխաջրերը, իսկ 20% պարզ ածխաջրերը), 10%-ը բուսական ճարպերը: Ակտիվ ապրելակերպով զբաղվող մարդկանց պրոտեինի պահանջն ավելի բարձր է, քան սպորտով  չզբաղվող մարդկանցը:

Մասնագետը շեշտում է, որ պետք է սնվել բավական հաճախ և փոքր չափաբաժիններով: Երեկոյան 6-ից հետո հաց չուտելն իրականում կարծրատիպ է, ինչպես և կարծրատիպ է շաբաթվա ընթացքում 6 ձվից ավել չօգտագործելը կամ ֆիթնես պարապմունքների ընթացքում ջուր չխմելը:

Օրգանիզմի նորմալ կենսագործունեության համար հասուն մարդն օրական պետք է օգտագործի 2-3 լիտր ջուր, որը կնպաստի նաև մկանային աճի զարգացմանը, կնվազեցնի երիկամներում քարերի առաջացումը:

«Խորհուրդ եմ տալիս մարդկանց ավելի շատ կարդալ և տեղեկացված լինել, գրագետ կերպով սնվել և մարզվել, ինչի դեպքում հնարավոր է ցանկալի արդյունքի հասնել: Լինում են դեպքեր, երբ ընդամենը 9 ամսում  նիհարում են 60 կիլոգրամով, իսկ 5 տարվա մարզումներից հետո քաշն ընդհանրապես չի նվազում: Ուստի, պետք է շատ ուշադիր լինել կատարած վարժությունների և դրան զուգահեռ պահվող դիետայի հանդեպ»,- նշել է Հովհաննես Ավագյանը: