Մայրաքաղաքի հիվանդանոցներում ստացիոնար բուժօգնություն է ստանում 6 ոստիկան, 3 զինված խմբի անդամ

• 27.07.2016, 12:25
•  Աշխարհ,  Հայաստան

shabat.am

ՀՀ ոստիկանության պարեկապահակային ծառայության գնդի տարածքում զինված միջադեպի և հետագա զարգացումների հետևանքով  ժամը 10.00-ի դրությամբ մայրաքաղաքի հիվանդանոցներում ստացիոնար բուժօգնություն է ստանում 14 հիվանդ, որից 6-ը` ոստիկան,  3-ը` զինված խմբի անդամ:

Ինչպես հաղորդում են ՀՀ առողջապահության նախարարության հասարակայնության հետ կապերի բաժնից, գիշերը տեղի ունեցած փոխհրաձգության հետևանքով «Էրեբունի» բժշկական կենտրոն են տեղափոխվել իրավապահ մարմինների 1 աշխատակից և զինված խմբի 2 անդամ ` հրազենային վնասվածքներով։ Զինված խմբի վիրավորում ստացած անդամները վիրահատությունից հետո գտնվում են վերակենդանացման բաժանմունքում։ Ըստ հաղորդված տվյալների,նրանց վիճակը մասնագետները գնահատում են կայուն ծանր։ Հոսպիտալացված ոստիկանը բաժանմունքում է, վիճակը գնահատվում է բավարար։

Ինչ վերաբերում է հուլիսի 17-ին հոսպիտալացված ոստիկանի առողջական, ապա համաձայն ստացված տվյալների՝ նրա վիճակը կայուն ծանր է, սակայն առկա է ակնհայտ դրական շարժընթաց։ Տուժածներին բոլոր հիվանդանոցներում ցուցաբերվում է անհրաժեշտ պատշաճ բուժօգնություն։

Զինված խմբի 2 անդամ տեղափոխվել են դատապարտյալների հիվանդանոց։