Ռուս-ամերիկյան լարվածությունը տարածվում է մեդիա ոլորտ

• 22.11.2017, 21:49
•  ԵԱՏՄ,  Ամերիկա

Yahoo

Օրերս ՌԴ Պետդուման միաձայն հաստատեց համապատասխան օրենսդրական փոփոխություններ, որոնց համաձայն՝ Ռուսաստանում արտասահմանյան լրատվամիջոցները կարող են օտարերկրյա գործակալ ճանաչվել, եթե նրանց ֆինանսավորում են արտասահմանից։ Նախկինում այս մեխանիզմը տարածվում  էր միայն ՀԿ-ների վրա:

ՌԴ Արդարադատության նախարարությունը հաստատել է, որ մի շարք լրատվամիջոցների արդեն նախազգուշացրել է նրանց օտարերկրյա գործակալ ճանաչելու հնարավորության մասին: Ծանուցումներ են ստացել «Ամերիկայի ձայնը», «Կավկազ․ Ռեալիի», «Ղրիմ․Ռեալիի», «Սիբիր․Ռեալիի», IdeLРеалии տարածաշրջանային նախագիծը, «Իրական ժամանակ» հեռուստաալիքը, «Ռադիո ազատ Եվրոպա/Ազատությունը (РСЕ/РС)», «Ազատություն ռադիոկայանի» թաթարա-բաշկիրական ծառայությունը, «Ֆակտոգրաֆ» նախագիծը։

Նշենք, որ օրենսդրական այս բարեփոխումները պատրաստվել էին ի պատասխան ռուսական Russia Today (RT) և Sputinik-ի նկատմամբ ԱՄՆ-ի իշխանությունների գործողությունների: Նոյեմբերի 13-ին RT America հեռուստաալիքըն ԱՄՆ արդարադատության դեպարտամենտի պահանջով ստիպված էր գրանցվել որպես օտարերկրյա գործակալ, որին Մոսկվան որոշեց հայելային արձագանքել:

Հատկանշական է, որ ամերիկյան Google ընկերության ներկայացուցիչները հայտարարել են, որ որոնողական համակարգում մտադիր են իջեցնել «պրոկրեմլյան լրատվամիջոցներ RT-ի և  Sputnik-ի նյութերի կարևորությունը՝ ի պատասխան Ռուսաստանի  հասցեին հնչող մեղադրանքների՝ այլ երկրների ընտրություններին միջամտելու հետ կապված»:

Այնուամենայնիվ, Մոսկվան չի պատրաստվում անտեսել ռուսական ԶԼՄ-ների նկատմամբ Միացյալ Նահանգների քաղաքականությունը, հայտարարել է ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշևիչը: «Роскомнадзор»-ն արդեն հայտարարել է, որ Google-ին հարցում կուղարկի`պարզելու իրավիճակը: Իր հերթին Google ընկերությունը ընդգծել է, որ առայժմ ռուսական ԶԼՄ-ների նկատմամբ կոնկրետ քայլեր չեն դիտարկվում:

Ավելի վաղ ԱՄՆ հետախուզական գործակալությունները պնդում էին, որ 2016թ. Մոսկվան օգնել է ԱՄՆ նախագահ Դոնալդ Թրամփին ընտրություններում հաղթելու համար, ինչպես նաև փորձել է վարկաբեկել նրա մրցակից Դեմոկրատական կուսակցության կողմից առաջադրված Հիլարի Քլինթոնին: Ռուսաստանի իշխանությունները մերժում են այդ մեղադրանքները: