Ավստրալական ABC-ն պատմել է Ավստրալիա արտագաղթած սիրիահայ արծաթագործի մասին

• 22.01.2018, 14:11
•  Մերձավոր Արևելք,  Աշխարհ,  Հայաստան

NEWS.am

Ավստրալական ABC-ն պատմել է հայ ոսկերիչի մասին, ով Սիրիայում քաղաքացիական պատերազմի պատճառով Ավստրալիա է արտագաղթել, փոխանցում է NEWS.am-ը:

Բայրամյանը արծաթագործությամբ էր զբաղվում Սիրիայի Հալեպ քաղաքում: Ընտանիքում այս արհեստով զբաղվել են բոլորը՝ դեռ մեծ պապից սկսած: 14 տարեկանից Բայրամյանը աշխատել է իր հորեղբոր արհեստանոցում: 2002 թ. Հալեպում իր սեփական խանութն էր բացել, որը, սակայն, ոչնչացվել էր պատերազմի ժամանակ: Ավոյի ընտանիքը Բեյրութ էր տեղափոխվել, այնտեղից՝ Ավստրալիա:
Ավստրալիայում Ավետիքին հաջողվել է գտնել իր երազանքի աշխատանքը: Այժմ Ավոն աշխատում է Ավստրալիայում արծաթե իրերի արտադրության վերջին ավանդական արհեստանոցում: W.J. Sanders արհեստանոցի սեփականատերը Դենիս Դե Մուտը գնահատել է Ավոյի արհեստն ու նրան աշխատանքի ընդունել: «Ավոյի աշխատանքներն ուղղակի հիանալի են: Նա նոր հմտություններ է ներմուծում: Շատ կարևոր է, որ բիզնեսը զարգանա և Ավոյի նման մարդիկ սովորեցնեն երիտասարդներին», - նշել է արհեստանոցի սեփականատերը:
Արհեստանոցի պատվերներից մեկը Ավստրալիայի թենիսի հաջորդ բաց առաջնության գավաթն է:
«Չեք պատկերացնի, թե որքան դժվար էր թողնել մեր ողջ կյանքն ու գալ այստեղ աշխատանք փնտրելու: Բայց եթե մարդը սիրում է իր աշխատանքը, ապա ջանասիրաբար աշխատում և հաջողության է հասնում»,- նշել է Բայրամյանը:
Նրա հինգ տարեկան դուստրը՝ Լուրդը, արդեն սկսել է հետաքրքրություն ցուցաբերել ընտանեկան գործի նկատմամբ: «Ես տեսնում եմ, որ նա դիզայնի տաղանդ ունի: Սա առաջին բանն է, որ անհրաժեշտ է այս գործում»,- նշել է Ավետիք Բայրամյանը: