Արցախում ավելացել է ներքին զբոսաշրջության պահանջարկը։ Համավարակի հետ կապված՝ զգալի ակտիվություն է նկատվում հանրապետության ներքին զբոսաշրջության պահանջարկի ավելացման առումով։ Այս մասին «Արցախպրես»-ին տեղեկացրել են ԱՀ ռազմահայրենասիրության, երիտասարդության, սպորտի և տուրիզմի նախարարությունից (ՌԵՍԶ)՝ նշելով, որ նոր կորոնավիրուսով պայմանավորված, ԱՀ մուտքի սահմանափակումների պատճառով, 2020 թվականի առաջին կիսամյակում ԱՀ այցելած օտարերկրյա զբոսաշրջիկների թիվը նվազել է 82 %-ով:
«Զբոսաշրջային ընկերությունների կողմից ակտիվորեն իրացվում են քայլարշավային տուրեր դեպի Դիզափայտ լեռ, Կաչաղակաբերդ, Պտկես Բերք կոչվող սրբավայր, Պատարա գյուղ ու շրջակայք, և այլ ուղղություններ։
Դեռևս փակ են մուտքի պայմանակարգով գործող բոլոր զբոսաշրջավայրերը, թանգարանները և արգելոցները»,-հայտնել են նախարարությունից:
ԱՀ ՌԵՍԶ զբոսաշրջության վարչության կողմից շարունակվում են ոլորտի վերահսկողության աշխատանքները․ 2020 թվականի առաջին կիսամյակում կատարվել է 1 հյուրանոցային տնտեսության օբյեկտի վերահաշվառում և 7 օբյեկտների հաշվառում:
2020 թվականի առաջին կիսամյակում կատարվել է թվով 35 հյուրանոցային օբյեկտների մոնիթորինգ, որի արդյունքում արձանագրվել են հետևյալ արդյունքները․4 օբյեկտում ցուցանակների փոփոխության անհրաժեշտություն կար, 6 օբյեկտ ենթակա էր վերահաշվառման, 2 օբյեկտ՝ հաշվառման:
