Իրանի ԱԳՆ-ն հերքել է միջուկային գործարքի շուրջ համաձայնության հասնելու մասին արեւմտյան ԶԼՄ-ների տեղեկությունները

• 18.02.2022, 11:53
•  Եվրոպա,  Տարածաշրջան,  Աշխարհ

Իրանի ԱԳՆ պաշտոնական ներկայացուցիչ Սաիդ Խաթիբզադեն հերքել է Վիեննայում միջուկային գործարքի շուրջ բանակցություններում համաձայնության հասնելու մասին արևմտյան ԶԼՄ-ների տեղեկությունները, հաղորդում է Mehr-ը։    

Reuters-ը հայտնել է, որ ստացել է Վիեննայի բանակցությունների մասնակիցների կողմից համաձայնեցված 20 էջանոց համաձայնագրի նախագիծը, որում նշվում է քայլերի հաջորդականությունը, որոնք պետք է իրականացվեն գործարքի մյուս մասնակիցների կողմից հաստատվելուց հետո:

«Իրանն ի սկզբանե հայտարարել է, որ քանի դեռ Միացյալ Նահանգները չի ձեռնարկել պատժամիջոցները չեղարկելու համար անհրաժեշտ քայլերը, Իսլամական Հանրապետությունը ոչինչ չի անի իր միջուկային գործունեությունը նվազեցնելու համար, ինչը համահունչ է ԳՀՀԾ-ով ստանձնած պարտավորություններին»,- ասվում է զեկույցում։ 

Վիեննայի բանակցություններում Ռուսաստանի գլխավոր ներկայացուցիչ Միխայիլ Ուլյանովը նույնպես թվիթերյան իր էջում գրել է, որ «միջուկային գործարքի հակառակորդները փորձում են անառողջ մթնոլորտ ստեղծել վերջին փուլի շուրջ և ավելի ակտիվ են դառնում հանրային տարածքում», քանի որ բանակցող կողմերը «ավելի են մոտենում ԳՀՀԾ-ի շուրջ համաձայնագրի վերականգնմանը», փոխանցում է news.am-ը: