Մինսկի խմբի մասին Լավրովի հայտարարությունը չի արտացոլում Միացյալ Նահանգների մոտեցումը. Լին Թրեյսի (տեսանյութ)

• 24.04.2022, 21:32
•  ԵԱՏՄ,  Ամերիկա,  Աշխարհ,  ԼՂՀ

ՌԴ արտաքին գործերի նախարար Սերգեյ Լավրովի հայտարարությունը եղել է Ռուսաստանի կառավարության կողմից, այն համակարգված հայտարարություն չէ և չի արտացոլում Միացյալ Նահանգների մոտեցումն այս հարցի շուրջ, Ծիծեռնակաբերդի հուշահամալիրում լրագրողների հետ զրույցում ասաց ՀՀ-ում ԱՄՆ դեսպան Լին Թրեյսին՝ արձագանքելով Սերգեյ Լավրովի հայտարարությանը, թե Ֆրանսիան և ԱՄՆ-ն հրաժարվել են համագործակցել Ռուսաստանի հետ ղարաբաղյան հարցում ԵԱՀԿ Մինսկի խմբի համանախագահների «եռյակի» շրջանակում, փոխանցում է Aysor.am-ը: 

«Ակնհայտ է, որ Ռուսաստանի կողմից Ուկրաինայի նկատմամբ ոչնչով չհրահրված այդ հարձակումը բարդացրել է ԵԱՀԿ ՄԽ գործունեեությունը։

Մենք կարծում ենք, որ այդ ձևաչափով հնարավորություններ կան ԼՂ հակամարտության խաղաղ կարգավորման ուղղությամբ», - ասել է դեսպանը։

Նա հիշեցրեց, որ անցած շաբաթվա ընթացքում Հայաստանում է գտնվել ՄԽ ամերիկացի համանախագահ Էնդրյու Շոֆերը և արդյունավետ քննարկումներ է ունեցել կառավարության ներկայացուցիչների հետ։

«Մենք կշարունակենք երկկողմ ձևաչափում որպես ՄԽ համանախագահ հնարավոր ուղիները դիտարկել խաղաղ կարգավորման ուղղությամբ», - ասել է Լին Թրեյսին։