Իմ պատկերացմամբ՝ դա լուծում չէ. ԿԲ նախագահը՝ դրամի արհեստական արժեզրկման մասին

• 22.06.2022, 15:34
•  Հայաստան

ՀՀ կենտրոնական բանկի նախագահ Մարտին Գալստյանն անդրադարձել է դրամի արժևորմանն ու արտահանողների խնդիրներին, այն արհեստականորեն արժեզրկելու կոչին:

«Արմենպրես»-ի հաղորդմամբ՝ Գալստյանն այս մասին խոսել է Orion Summit 2022 գագաթնաժողովում` պանելային քննարկման շրջանակում, փոխանցում է Tert.am-ը:

Մարտին Գալստյանը նախ խոսեց դրամի արժևորման մասին: Անդրադառնալով դրան նպաստող գործոններին՝ նա նշեց Հայաստան օտարերկրյա այցելուների հոսքի մասին, ծառայությունների արտահանման աճի մասին: «Ձեզնից շատերն են երեկոյան լինում ռեստորաններում, որտեղ կարող եք տեսնել, թե ինչքան օտարերկրացիներ կան: Ըստ վիճակագրական կանոնների` դա պետք է գրանցվի որպես արտահանում։ Այսպիսով, այս տարվա ընթացքում մենք կարող ենք տեսնել Հայաստանից արտահանման անհավանական աճ, ինչը, բնականաբար, բերում է ազգային արժույթի արժևորման»,- ասաց Գալստյանը:

«Իմ պատկերացմամբ՝ դա լուծում չէ։ Լուծումը եզակի, ունիկալ լինելն է։ Եթե մենք ուզում ենք լինել եզակի, կան բազմաթիվ բաներ, որոնք մենք կարող ենք միասին անել: Բայց ես հույս չէի դնի միայն արհեստականորեն արժեզրկման վրա»,- ասաց Գալստյանը:

Վերջին շրջանում հայկական դրամը արժևորվում է հատկապես դոլարի նկատմամբ: Հունիսի 21-ին ԿԲ-ի կողմից սահմանված փոխարժեքների համաձայն՝ ԱՄՆ դոլարի փոխարժեքը նվազել է 4.02 դրամով և կազմել 417.01 դրամ: Եվրոյի փոխարժեքը նվազել է 3.40 դրամով և կազմել 440.07 դրամ: