Լեհաստանը Գերմանիային սպառնացել է խնդիրներով՝ փոխհատուցման հարցը քննարկելուց հրաժարվելու համար

• 09.01.2023, 14:20
•  Եվրոպա,  Աշխարհ

Լեհաստանի արտաքին գործերի նախարարությունը զգուշացրել է Գերմանիային, որ Երկրորդ համաշխարհային պատերազմի ժամանակ պատճառված վնասների համար Լեհաստանին փոխհատուցում վճարելու հարցով Վարշավայի հետ բանակցություններից հրաժարվելը «մեծ խնդիր» կառաջացնի երկրի իմիջի համար։ ՏԱՍՍ-ի փոխանցմամբ՝ այդ մասին երկուշաբթի օրը ռադիոյի եթերում հայտարարել է Լեհաստանի արտաքին գործերի փոխնախարար Պավել Յաբլոնսկին, հայտնում է Panorama-ն:

Ավելի վաղ Լեհաստանի ԱԳՆ-ն հայտնել էր, որ Գերմանիայի իշխանությունները Վարշավային տեղեկացրել են, որ փոխհատուցման հարցը փակված են համարում և այս թեմայով երկխոսություն չեն վարի։

«Այս պատասխանը, դրա ձևը մեկ նախադասությամբ, ցույց է տալիս հեռուն գնացող ամբարտավանություն, զոհերի նկատմամբ հարգանքի բացակայություն»,-ասաց Յաբլոնսկին։

Նրա խոսքով՝ այդ պատասխանը, նրա ձևը ու ոճը մեծ իմիջային խնդիրներ են լինելու Գերմանիայի համար։
«Որովհետև մենք դրա մասին շատ բարձր ենք խոսելու: Գերմանիան իր մասին ասում է, որ ուզում է լինել բարոյական պետություն, որը թրենդեր է սահմանում մարդու իրավունքների և միջազգային իրավունքի առումով, բայց միևնույն ժամանակ անում է նման բան, դա մեծ խնդիր կլինի իրենց համար: Նրանք շատ կամաչեն դրա համար»,- զգուշացրել է Լեհաստանի ԱԳՆ ներկայացուցիչը։

2022թ. սեպտեմբերի 1-ին Լեհաստանի իշխանությունները ներկայացրել են հանրապետության փորձագետների կողմից պատրաստված եռահատոր զեկույցը 1939-1945 թվականներին նացիստական Գերմանիայի հարձակման և գերմանական օկուպացիայի հետևանքով Լեհաստանի կրած կորուստների մասին։ Հայտարարված ընդհանուր գումարը կազմել է մոտ 1,3-1,5 տրլն դոլար: Հոկտեմբերի 3-ին Լեհաստանի արտգործնախարար Զբիգնև Ռաուն նոտա է ստորագրել՝ Գերմանիայից փոխհատուցում վճարելու պահանջով։