Լուկաշենկոն սպառնում է դուրս գալ Եվրասիական Միությունից

Իր հայտարարության մեջ Լուկաշենկոն հիշեցրել է, որ Բելառուսը Եվրասիական Միության մասին պայմանագիրը ստորագրել է վերապահումով: Դրա էությունը կայանում է նրանում, որ եթե պայմանավորվածությունները չկատարվեն, ապա իրենք իրավունք ունեն դուրս գալ այդ միությունից:
Ռուսաստանի և Բելառուսի միջև հարաբերությունները հերթական անգամ բարդացան, երբ Արևմուտքը Մոսկվայի նկատմամբ պատժամիջոցներ մտցրեց, իսկ վերջինս էլ էմբարգո դրեց ԵՄ-ից ներկրվող ապրանքների վրա, որից հետո էլ հայտնաբերեց, որ Մինսկը կատարում է ներմուծման համար արգելված ապրանքների կրկնակի արտահանում: Սակայն Լուկաշենկոն կտրականապես հերքել է մեղադրանքները, ասելով, որ Բելառուսը կապ չունի ռուսական պատժամիջոցների հետ և միտք էլ չունի դաշնակցի դրության մեջ մտնել: Ի դեպ, նման դիրքորոշում է ցուցաբերում նաև Ղազախստանը:
Լուկաշենկոն չի կարող հույսը դնել միայն Ռուսաստանի ու ԵԱՏՄ վրա և ցանկանում է զարգացնել տնտեսական հարաբերությունները Եվրոպայի հետ:
Նախագահը ցուցադրում է սեփական արտաքին քաղաքականության բազմավեկտորություն, կարծելով, թե դա օգուտ է բերում իր երկրին, կարծիք է հայտնում Հումանիտար-քաղաքական հետազոտությունների միջազգային ինստիտուտի փարձագետ Վլադիմիր Բրուտերը:
«Եվրասիական Միությունից դուրս գալով վախեցնելը և միաժամանակ ԱՄՀ-ից պարտքով գումար խնդրելը Լուկաշենկոյի խուսանավման քաղաքականության ավանադական օրինակն է: Եվ դրա հիմնական առիթը Ռուսաստանում ճգնաժամային իրավիճակն է: Լուկաշենկոն համոզված է, որ ճգնաժամի ու մեկուսացման իրավիճակում Մոսկվան չի ցանկանա զրկվել իր հավատարիմ դաշնակցից և սովորականից ավելի շատ գումար կտա», - ասում է Բրուտերը: