Ալիևի խեղաթյուրված պատկերացումները ղարաբաղյան հակամարտության մասին

ՀՀ ԱԳՆ մամուլի քարտուղարի մեկ այլ գրառման համաձայն, Ադրբեջանի նախագահը հրաժարվում է հավատարիմ մնալ ԵԱՀԿ Մինսկի խմբի համանախագահների կողմից առաջարկված ղարաբաղյան հակամարտության խաղաղ կարգավորման երեք սկզբունքներին:

Նշենք, որ փետրվարի 7-ին Մյունխենի անվտանգության 51-րդ համաժողովի շրջանակներում Ադրբեջանի նախագահը ելույթ ունեցավ «Ուկրաինայից այն կողմ. չկարգավորված հակամարտությունները Եվրոպայում» անունը կրող քննարկման ժամանակ: Իր ելույթից հետո Ալիևը պատասխանեց իրեն ուղղված հարցերին: Ալիևի ելույթը գրեթե չի տարբերվել նախկինում հնչած իր հայտարարություններից:

ՀՀ ԱԳՆ ներկայացուցիչը հարց է ուղղել Ալիևին. «Ինչպես ճշմարտացիորեն նշեց նախագահ Ալիևը, Մինսկի խմբի շրջանակներում ԱՄՆ-ի և Ֆրանսիայի համագործակցությունը Ռուսաստանի հետ բացառիկ դեպք է: Այս 3 միջնորդ երկրները՝ ԱՄՆ-ը, Ռուսաստանը և Ֆրանսիան, ԼՂ հակամարտության կարգավորման 3 հիմնական սկզբունքներ են մատնանշել: Այդ հիմնական սկզբունքներն են ազգերի ինքնորոշման իրավունքը, ուժի և ուժի սպառնալիքի չկիրառումը և տարածքային ամբողջականությունը: Միջնորդները կոչ են արել բանակցային գործընթացի կողմերին այս 3 հիմնական սկզբունքների հետ կապված պարտավորությունների ստանձնել: Հայաստանը բազմիցս պարտավորվել է իրականացնել այս սկզբունքները: Ես հարցս ուղղում են պարոն նախագահին: Արդյո՞ք Ադրբեջանը պատրաստ է պատասխանատվություն ստանձնել այս 3 սկզբունքների՝ որպես ԼՂ հակամարտության կարգավորման հիմքի կատարման հետ կապված»:

Ալիևը պատասխանել է, որ «Ադրբեջանը հակամարտության կարգավորման ամենաշահագրգիռ կողմն է, քանի որ ցանկանում է ետ վերադարձնել իր հողերը»: «Խնդիրն այն է, թե ինչո՞ւ այս հակամարտությունը չի կարգավորվում: Քանի որ Հայաստանը դա չի ցանկանում: Չկա որևէ մեխանիզմ, որն ի զորու կլինի ստիպել Հայաստանին համաձայնվել միջազգային իրավունքի նորմերի հետ: Ցանկացած հակամարտության կարգավորում պետք է հիմնվի միջազգային իրավունքի նորմերի վրա: Միջազգային իրավունքի այս նորմերն իրենց հստակ արտացոլումն են գտել ՄԱԿ-ի Կանոնադրությունում և Հելսինկյան Եզրափակիչ ակտում: Հելսինկյան Եզրափակիչ ակտը տարածքային ամբողջականության և ինքնորոշման հետ կապված բավական պարզ պարզաբանում է պարունակում: Մենք դեմ չենք ինքնորոշման սկզբունքին, սակայն այդ սկզբունքը չպետք է խախտի երկրների տարածքային ամբողջականությունը: Լեռնային ղարաբաղի հայերը և հայկական բանակի կողմից վտարված ադրբեջանցիները, վերադառնալով հայրենի հողեր, իրենց կյանքը կարգավորելու իրավունք կունենան: Սակայն դա չպետք է խախտի երկրի տարածքային ամբողջականությունը: Այս կամ այն երկրի տարածքային ամբողջականությունը չի կարող փոխվել ուժի կիրառման միջոցով, ինչը փորձում է անել Հայաստանը: Բացի այդ, որևէ երկրի տարածքային ամբողջականութունը չի կարող փոփոխվել առանց այդ երկրի հետ համաձայնության ձեռքբերման: Սրանք են հիմնական սկզբունքները: Եվս մեկ անգամ նշում են, որ մենք դեմ չենք միջազգային իրավունքի հիմնական սկզբունքներին: Սակայն Հայաստանն, առաջին հերթին, պետք է հարգի միջազգային իրավունքը և իրականացնի ՄԱԿ-ի ԱԽ-ի ընդունած 4 բանաձևերը, որոնք պահանջում են Հայաստանի զինված ուժերի անհապաղ և անվերապահ դուրսբերում օկուպացված հողերից», - Ալիևի խոսքերը մեջբերում է Azertag-ը:

Հայաստանի ներկայացուցիչները նաև հիշեցրել են Ալիևին, որ «մի քանի օր առաջ ԵԱՀԿ Մինսկի խումբը, դիմելով Ադրբեջանին, կոչ արեց կատարել ԼՂ հակամարտության կարգավորման հարցում իր ստանձնած պարտավորությունները»: «Պատահական չէ, որ նրանց կոչն ուղղված է ձեզ, քանի որ հենց ադրբեջանական կողմն է շարունակում անտեսել այս կոչերը և խախտել հրադադարի ռեժիմը Հայաստան-Ադրբեջան սահմանին, ինչպես նաև Լեռնային Ղարաբաղի և Ադրբեջանի միջև շփման գծում: Հունվարից սկսած ադրբեջանական կողմը ավելի քան 3.000 անգամ խախտել է զինադադարը, որի հետևանքով բազմաթիվ կորուստներ են եղել բոլոր կողմերից: Ընդամենը մի քանի օր առաջ ձեր դիպուկահարները 65 և 85 տարեկան հայերի են սպանել: Չե՞ք կարծում, որ ձեր գործողություններով դուք ավելի եք սրում իրավիճակը և այսպիսով Լեռնային Ղարաբաղի խաղաղ կարգավորումն ավելի դժվար իրականանալի դարձնում մոտ ապագայում:

Ես կցանկանայի վերհիշել գիտաժողովի վարող Սլովենիայի նախագահ Պահորի հարցն այն մասին, թե ո՞րը պետք է լինի առաջին քայլը, որպեսզի հակամարտությունների կարգավորման հարցում առաջընթաց լինի: Դուք այս ու այն կողմ ընկաք, բայց չխոսեցիք ամենակարևորի մասին: Հակամարտության կարգավորումն սկսվում է, երբ դադարում են կրակոցները: Այսպիսով, իմ կոչը ձեզ հետևյալն է՝ դադարեցրե՛ք կրակոցները»: