Պուտինը նախաձեռնել է տնտեսության վերակառուցում

• 08.04.2015, 17:00
•  ԵԱՏՄ,  Աշխարհ

Ներկա տնտեսական ճգնաժամը բացառիկ հնարավորություն է մանր և միջին ձեռներեցության զարգացման համար։ Նման կարծիք է հայտնել ՌԴ նախագահ Վլադիմիր Պուտինը նախօրեին կայացած Պետական խորհրդի նիստի ժամանակ։

Պուտինը նշել է, որ ներկայիս տնտեսական բարդ դրության պայմաններում, երբ նավթի գներն անկում են ապրում, բացակայում է տնտեսության արտաքին ֆինանսավորումը, իսկ ռուսական ռուբլին արժեզրկվում է, անհրաժեշտ են հավելյալ ջանքեր մանր և միջին ձեռներեցության զարգացման համար։ «Մանր և միջին ձեռներեցությունը պետք է դառնան ռուսական տնտեսության հիմքը».- հայտարարել է Պուտինը։

Ռուսաստանում մանր և միջին ձեռներեցության զարգացմանը նպաստելու և պետական մակարդակով աջակցելու համար Պուտինը հանձնարարել է ստեղծել Մանր և միջին ձեռներեցության պետական զարգացման գործակալություն, որը վերոհիշյալ հարցով կզբաղվի դաշնային մակարդակով։

Պուտինը նաև հանձնարարել է երկրի գլխավոր դատախազությանը վերլուծել համպատրաստից ստուգումների հիմքերը՝ դրանք նվազեցնելու նպատակով, իջեցնել վարկավորման դրույքաչափերը և սկսել կիրառել 2 տարի տևողությամբ հարկային արձակուրդների մեխանիզմ։

Ավելացնենք, որ վերջին երկու տարիների ընթացքում պատժամիջոցների պատճառով Ռուսաստանում մանր և միջին բիզնեսը լուրջ վնասներ է կրել, ինչը պայմանավորված է ոչ միայն տնտեսական ճգնաժամով, այլ նաև պետական աջակցության բացակայությամբ։

Ռուսական իշխանություններն այժմ փորձում են լրացնել այս բացը։ Նշենք, որ հարկային արձակուրդների տրամադրման հարցում արդեն պարզաբանում է արվել՝ նշելով, որ դրանք վերաբերելու են միայն ֆիզիկական անձանց։

Ռուսաստանում մանր և միջին ձեռնարկատրություններում աշխատողների թիվը հասնում է 18 մլն(25 տոկոս)`  երկրի ՀՆԱ-ում ունենալով 21 տոկոս ներդրում։

Զարգացած երկրներում մանր և միջին ձեռնարկատրություններում զբաղվածների թիվը կազմում է 40-85 տոկոս՝ ՀՆԱ-ի մեջ 40-60 տոկոս ներդրումով։

Ռուսական ղեկավարության կողմից վերջին շրջանում ձեռնարկված քայլերը հիմք են տալիս ենթադրելու, որ բացի տնտեսության դիվերսիֆիկացումից, փորձ է կատարվում վերակառուցել ավելի քան 20 տարի գործող կարծրացած համակարգը: Արդյոք նման նախաձեռնությունը հաջողությամբ կպսակվի, թե կհանգեցնի նոր ներկլանային հակասությունների ռուսական վերնախավում, կախված է բարեփոխումների ընթացքից: