Եմենը պատրաստ է խզել դիվանագիտական հարաբերություններն Իրանի հետ

• 15.05.2015, 19:22
•  Մերձավոր Արևելք,  Աշխարհ

Եմենը որոշել է հետ կանչել իր դեսպանին Իրանից, քանի որ Թեհրանն Արաբական թերակղզու այս հանրապետություն «համարձակվել» է նավով հումանիտար օգնություն ուղարկել։ Եմենի իշխանությունները պահանջում են, որ իրանական նավը ստուգվի, սակայն Թեհրանում կարծում են, որ այդպիսի գործողություններն անօրինական են, գրում է Reuters-ը։

Ավելի վաղ՝ այն բանից հետո, երբ Սաուդյան Արաբիան հայտարարեց իրանական հումանիտար նավերը ստուգելու մտադրության մասին, Իրանի Գլխավոր շտաբի պետի տեղակալ Մասուդ Ջազայերին նախազգուշացրել էր, որ Իրանի զինուժը ռազմական գործողություններ կսկսի ցանկացած պետության դեմ, որը կփորձի ստուգել իրանական հումանիտար նավերը։

ՄԱԿ-ին ուղղված նամակում Եմենը «իրանական նավերի՝ Եմենի տարածքային ջրեր մտնելու պատճառով առաջացած ցանկացած բացասական հետևանքի պատասխանատվությունն ամբողջությամբ դնում են Իրանի վրա»։

Նախօրեին Սաուդյան Արաբիայի գլխավորած կոալիցիան Եմենում բնակչությանը մարդասիրական օգնություն տրամադրելու նպատակով հնգօրյա հրադադար էր հայտարարել։ ՄԱԿ-ի փոխանցմամբ՝ այժմ երկիրը գտնվում է մարդասիրական աղետի նախաշեմին և այդ 5 օրը մարդասիրական կազմակերպություններին բավարար չեն երկրի ողջ բնակչությանն օգնություն ցուցաբերելու համար։

Մարտի 25-ին Սաուդյան Արաբիայի գլխավորած արաբական կոալիցիան սկսեց օդային հարվածներ հասցնել Եմենում «Անսար Ալլահ» խմբավորման դիրքերին, որը 2014 թվականի օգոստոսից զինված պայքար է մղում Եմենի իշխանությունների դեմ։ Նրանք մեծ առաջխաղացում արձանագրեցին, մասնավորապես, այս տարվա սկզբին, երբ երկրի նախագահ Հանդին ստիպված էր հեռանալ երկրից։ Մարտի սկզբին Հադին դիմեց ՄԱԿ-ին և արաբական երկրներին բոլոր հնարավոր միջոցներով Եմենի օրինական իշխանություններին շիա ապստամբների դեմ պայքարում օգնելու խնդրանքով։

Պաշտոնական Սանան պնդում է, որ վերջիններս հովանավորվում են Թեհրանի կողմից, որը, սակայն ամեն կերպ հերքում է այդ մեղադրանքները։ Այս պնդումները բավականին ձեռնտու են տարածաշրջանում Իրանի վաղեմի մրցակից Սաուդյան Արաբիայի համար։ Էր Ռիադը ամեն կերպ փորձում է օգտագործել այս հանգամանքն Իրանի նկատմամբ միջազգային ճնշումը մեծացնելու համար, սակայն դա նրան չի հաջողվում։ Այժմ Արևմուտքը և միջազգային հանրությունն ընդհանրապես բավականին զգույշ են Իրանի հարցում, քանի որ ցանկացած, անգամ չնչին վրիպում կարող է բասացաբար ազդել Իրանի միջուկային ծրագրի շուրջ ձեռքբերված փխրուն համաձայնության վրա։