Իրանի միջուկային ծրագրի շուրջ համաձայնագիրը չի կրելու մշտական բնույթ. Աբբաս Արագչի

• 10.06.2015, 21:20
•  Մերձավոր Արևելք,  Աշխարհ

Իրանի և Վեցյակի միջև հնարավոր համապարփակ միջուկային գործարքի կետերից և ոչ մեկը չի կրելու մշտական բնույթ: Այս մասին հայտարարել է Իրանի արտգործնախարարի տեղակալ, միջազգային միջնորդների հետ բանակցություններում իրանական պատվիրակության ղեկավար Աբբաս Արագչին: Նա ընդգծել է, որ եթե կողմերին հաջողվի համաձայնագիր կնքել, ապա այն կնքվելու է որոշակի ժամանակով, տեղեկացնում է իրանական  Fars լրատվական գործակալությունը:

Անդրադառնալով հունիսի 8-ին կայացած Ամերիկյան հրեական կոմիտեի ամենամյա Գլոբալ ֆորումի ժամանակ ԱՄՆ-ի պետքարտուղարի տեղակալ Էնթոնի Բլինկենի հայտարարությանն այն մասին, որ Իրանի հետ միջուկային գործարքը չունի գործողության ժամկետ՝ Արագչին նշել է, որ այդ հայտարարությունն արված է հիմնականում ներքին լսարանի և սեփական դաշնակիցներին բավարարելու համար:

Իրանի միջուկային ծրագրի շուրջ համաձայնագրի կնքման վերջնաժամկետին մնացել է երեք շաբաթից էլ քիչ ժամանակ: Չնայած կողմերն առաջընթաց են գրանցել բանակցություններում, սակայն դեռևս մնում են մի շարք հարցեր, որոնց շուրջ առկա են սկզբունքային տարաձայնություններ: Դեռևս բաց է մնում Իրանի ռազմական օբյեկտներում ստուգումներ անցկացնելու հարցը, որին կտրականապես դեմ է Թեհրանը:

Օրակարգի ամենաքննարկվող հարցերից են նաև ՄԱԳԱՏԷ-ի փորձագետների մուտքն Իրանի տարածքում գտնվող օբյեկտներ, միջուկային ծրագրի վերահսկողության և պատժամիջոցների հնարավոր վերականգնման մեխանիզմներն ու արտահանման վերահսկողության իրականացումը:

Որոշ վերլուծաբաններ կասկածանքով են վերաբերվում Իրանի և Վեցյակի միջև մինչև հունիսի 30-ը համաձայնության հնարավորությանը: Սակայն ԱՄՆ փոխպետքարտուղար Էնթոնի Բլինկենը վստահ է, որ «շատ կասկածներ անտեղի են և նման են առասպելի, քան փաստի»։

Այսօր Վիեննայում մեկնարկում է իրանական միջուկային ծրագրի շուրջ «վեցյակի» ու Իրանի բանակցությունների հերթական փուլը:

Պլանավորված է, որ Ավստրիայի մայրաքաղաքում կսկսեն աշխատել փորձագետները: Նրանց ջանքերը համակարգելու են ԵՄ-ի՝ քաղաքական հարցերով արտաքին ծառայության գլխավոր քարտուղարի տեղակալ Հելգա Շմիդն ու Իրանի փոխարտգործնախարար Աբաս Արաղչին: Քաղաքական տնօրենների մակարդակով լայն ձևաչափով հանդիպումը տեղի է ունենալու հունիսի 12-ին: