Համացանցում Հունաստանի տնտեսությունը փրկելու համար գումար են հավաքում

• 01.07.2015, 10:03
•  Եվրոպա,  Աշխարհ

IndieGoGo կրաուդֆանդինգյան ցանցում բրիտանացի Թոմ Ֆինիի նախաձեռնությամբ դրամահավաք է կազմակերպվել Հունաստանի տնտեսության վերականգնման համար, տեղեկացնում է BBC-ն: Դրամահավաքը սկսելուց ի վեր 3 օրում օգտատերերը հավաքել են մոտ հազար եվրո:

«Դա կատակ չէ: Կրաուդֆանդինգը իսկապես կարող է օգնել: Ես հոգնել եմ՝ տեսնելով, թե ինչպես է հունական ճգնաժամը փուլից փուլ տեղափոխվում, քանի դեռ քաղաքական գործիչները դանդաղում և տատանվում են: Դա ազդում է հասարակ մարդկանց կյանքի վրա»,-մեկնաբանում է 29-ամյա բրիտանացին:

Նախաձեռնությունը սկսվել է անցած կիրակի: Նպատակն է հավաքել 1.6 մլրդ եվրո մինչև հուլիսի 7-ը: Նվազագույն՝ 3 եվրո օգնություն տվողին Ֆինին խոստանում է Հունաստանի վարչապետ Ալեքսիս Ցիպրասի մակագրությամբ բացիկ, 6 եվրո տվողին՝ հունական աղցան, 25 եվրոյի դիմաց՝ մեկ շիշ հունական գինի:  

Հուլիսի 5-ին նախատեսվում է Հունաստանում ռեֆերենդում անցկացնել վարկատուների պահանջները ընդունել-չընդունելու վերաբերյալ: