Ուկրաինան Ռուսաստանից Ղրիմի և Դոնբասի համար 50 մլրդ դոլար է պահանջում

• 23.09.2015, 16:04
•  Աշխարհ

Ուկրաինայի իշխանությունները մտադիր են Ռուսաստանից միջազգային դատարաններում մոտ 50 մլրդ դոլար պահանջել որպես «վնասի փոխհատուցում» Ղրիմի և Դոնբասի համար: Այս մասին ասել է երկրի արտաքին գործերի նախարար Պավել Կլիմկինը, գրում է Lenta.ru-ն:

«Խոսքը միլիարդավոր գումարների մասին է: Ընդ որում՝ միլիարդավոր գումարները կարող են լինել տարբեր հայցերով: Կարծում եմ, տարբեր հայցերով գումարը կարող է հավասարվել ՅՈՒԿՕՍ-ի գործով փոխհատուցման չափին»,- նշել է Կլիմկինը:

Նա ընդգծել է, որ ուկրաինական կողմը հաշվել է ամեն ինչ՝ «նույնիսկ բնական պաշարները՝ ներառյալ ավազը, որն ուկրաինացիները չեն կարողանում օգտագործել»: Ըստ Կլիմկինի` այս հարցի լուծումը միջազգային դատարաններում 4-6 տարի կպահանջի:

Նշենք, որ սա Ռուսաստանի դեմ Ուկրաինայի առաջին հայցը չէ միջազգային դատարան: Կիևը Ղրիմի՝ Ռուսաստանին միավորվելու կապակցությամբ Ուկրաինայի կրած տնտեսական վնասները փոխհատուցելու վերաբերյալ Մարդու իրավունքների եվրոպական դատարան արդեն հայց է ներկայացրել 2014 թվականի դեկտեմբերին: Հայցում նշված գումարը գերազանցում է տրիլիոն գրիվնան, որը համարժեք է 47.3 մլրդ ամերիկյան դոլարի: Ավելի վաղ Ուկրաինայի վարչապետ Արսենի Յացենյուկը հայտարարել էր, որ Կիևը մտադիր է Մոսկվայի դեմ հայց ներկայացնել թերակղզում սեփականության կորստի յուրաքանչյուր դեպքի համար:

Այժմ Կիևը Մարդու իրավունքների եվրոպական դատարանին մի քանի հայց է ներկայացրել Մոսկվայի դեմ: Օգոստոսի 4-ին Կիևը հայտարարեց Մարդու իրավունքների եվրոպական դատարան Ռուսաստանի դեմ չորս հայց ներկայացնելու մասին: Ուկրաինայի արդարատադության նախարար Պավել Պետրենկոյի փոխանցմամբ՝ խոսքը վերաբերում է Ղրիմի տարածքում Ռուսաստանի կողմից մարդու իրավունքների խախտումների դեպքերին:

Ավելի վաղ՝ հունիսի 2-ին, Ուկրաինայի արդարադատության նախարարի տեղակալը հայտնեց, որ Ուկրաինան մտադիր է պահանջել Ռուսաստանի արտասահմանյան գույքը՝ որպես երկրի կազմից Ղրիմի դուրս գալու հետևանքով ստացած տնտեսական վնասների փոխհատուցում:

Ինչպես նշել է Ուկրաինայի արտաքին քաղաքական գերատեսչության ղեկավարը, եթե Կիևին հաջողվի ապացուցել, որ Ռուսաստանը ահաբեկչություն հովանավորող երկիր է, ապա իրենք նմանատիպ հայցով ևս կդիմեն միջազգային դատարան:

Ռուսաստանը այս հայտարարութուններին և հայցերին վերաբերում է բավականին սառնասրտորեն: Մոսկվայում համոզված են, որ Կիևի մոտ ոչինչ չի ստացվի, հատկապես, որ նման նախադեպ դեռևս չի եղել: