ԱՄՆ-ն Ադրբեջանի դեմ երկրորդ օրինագիծն է պատրաստում. նախկին դեպան

• 29.12.2015, 19:46
•  Տարածաշրջան,  Աշխարհ

Ադրբեջանում ԱՄՆ-ի նախկին դեսպան Ռիչարդ Կոզլարիչը հանդես է եկել սենսիացիոն հայտարարությամբ, գրում է haqqin.az-ը: Նրա խոսքերով՝ Վաշինգտոնն Ադրբեջանի դեմ պատրաստում է  երկրորդ օրինագիծը, որը ներկայացրել է սենատոր Կարդինը: Այս օրինագիծը, ենթադրվում է, որ ավելի խիստ է լինելու քան նախորդը, քանի որ նախատեսում է Մագնիտսկու օրինագծի նախատիպի տարածումն Ադրբեջանի վրա:

«Համաներման մասին վերջին հրամանը Ադրբեջանի համար իրավիճակը դեպի լավը փոխելու իսկապես կորսված հնարավորություն է։ Դա հաստատում է նաև այն, ինչի մասին ես երկար ժամանակ ասել եմ, որ Բաքվի ռեպրեսիվ ռեժիմն իր համար սպառնալիք է տեսնում Արևմուտքի հետ մերձեցման մեջ։ Ես չեմ կարող ասել, թե ինչ են մտածում Ադրբեջանի իշխանությունները, սակայն թվում է, թե նրանք պարզապես որոշել են Արևմուտքին ցույց տալ, որ շահագրգռված չեն լավ հարաբերություններ ունենալով։ Այնպես որ դա նրանց ընտրությունն է և ոչ թե մեր հարկադրանքը», - նշել է նա Turan-ի հետ հարցազրույցում:

Հիշեցնենք, որ դեկտեմների 17-ին ԱՄՆ Կոնգրեսի Հելսինկյան հանձնաժողովի ղեկավար Քրիստոֆեր Սմիթի Կոնգրեսին էր ներկայացրել «Ադրբեջանում ժողովրդավարության համար ակտ» օրինագիծը։ Այն նախատեսում է Ադրբեջանի պաշտոնատար անձանց, այդ թվում՝ երկրի նախագահի դեմ պատժամիջոցներ սահմանում, ինչպես նաև ադրբեջանական կառավարության կողմից իրականացվող ծրագրերի ֆինանսավորման դադարեցում այնքան ժամանակ մինչև որ չլուծվեն այդ երկրում մարդու իրավունքների ոլորտում առկա խնդիրները։

Սրան ի պատասխան՝ Ադրբեջանի խորհրդարանի պատգամավոր Ռովշան Ռզաևը հանդես է եկել օրենսդրական նախաձեռնությամբ: «ԱՄՆ-ում մարդու իրավունքների մասին» ծիծաղաշարժ վերնագրով բանաձևում ադրբեջանցի խորհրդարանականն առաջարկում է կասեցնել ԱՄՆ-ի հետ համագործակցությունն էներգետիկ, անվտանգության ու ռազմական ոլորտներում, արգելել Ադրբեջանի տարածքով ԱՄՆ-ի ռազմական ու այլ բեռների տարանցումը, սկսել ԵԱՀԿ Մինսկի խմբի համանախագահող երկրի պաշտոնից ԱՄՆ-ին հեռացնելու ընթացակարգ և այլն։ Այս օրինագիծը ներկայացվել է Ադրբեջանի խորհրդարանի այսօրվա լիագումար նիստում: Փաստաթուղթը խորհրդարանի նախագահ Օգտայ Ասադովի հանձնարարականով կդիտարկվի խորհրդարանի՝ մարդու իրավունքների, իրավական քաղաքականության ու պետականաշինության հարցերով, միջազգային հարաբերությունների ու միջխորհրդարանական կապերի հանձնաժողովներում։ Ադրբեջանցի խորհրդարանականների կողմից քննարկվող այս օրինագծի միայն վերնագիրը հերթական անգամ ապացուցում է, որ Բաքվում կորցրել են իրականության զգացումը: