Պորոշենկոն մոռացել է սեղմել Մերկելի ձեռքը

• 02.02.2016, 19:28
•  Եվրոպա,  Աշխարհ

vvc.kiev.ua

Ուկրաինական ճգնաժամի կարգավորման շուրջ այսօր Գերմանիայի կանցլեր Անգելա Մերկելը և Ռուսաստանի նախագահ Վլադիմիր Պուտինը հեռախոսազրույց են ունեցել: «Հանգամանալից քննարկվել է Ուկրաինայում ճգնաժամային իրավիճակի կարգավորման խնդիրը», -ասվում է Կրեմլի տարածած հայտարարության մեջ: Նշվում է, որ կողմերը փոխադարձ հետաքրքրվածություն են դրսևորել շփման գծում կայուն հրադադարի հաստատման հարցում՝ ընդգծելով, որ Մինսկի համաձայնագրերին այլընտրանք չի կարող լինել: Կողմերն անդրադարձել են նաև Ուկրաինայում սահմանադրական բարեփոխումների անցկացման և Դոնբասում տեղական ընտրությունների կազմակերպման հարցերին:

Նշենք, որ նախօրեին Բեռլինում  Մերկելը հանդիպում էր ունեցել Ուկրաինայի նախագահ Պյոտոր Պորոշենկոյի հետ, որի ժամանակ քննարկվել են Մինսկի պայմանավորվածությունների կատարման ընթացքը: Հանդիպամ ավարտին կայացած մամուլի ասուլիսի ժամանակ Գերմանիայի կանցլերը հայտարարել է, որ ԵՄ-ն շարունակելու է Ռուսաստանի հանդեպ պատժամիջոցները, քանի որ մինսկյան համաձայնագրերը մինչև վերջ կատարված չեն: Մերկելը նկատել է, որ Ուկրաինայի արևելքում մինչ այժմ գոյություն չունի լիարժեք հրադադար, և որ «նորմանդական քառյակ»-ի մասակիցները պետք է պայմանավորվեն Դոնբասում խաղաղության երաշխիքների շուրջ։ Մերկելը մամուլի ասուլիսի ժամանակ հայտարարել է նաև, որ ԵՄ շարունակելու է ֆինանսկան աջակցություն ցուցաբերել Ուկրաինային, որը գտնվում է դեֆոլտային վիճակում:

Սակայն, Մերկել-Պորոշենկո բանակցություններում գլխավոր թեման սահմանադրական փոփոխություններն են եղել: Ուկրաինայի նախագահը պնդում է, որ դրանց ընդունումը հետաձգվի, քանի որ, ըստ Կիևի, Մոսկվան, ԴԺՀ-ն և ԼԺՀ-ն խախտում են հրադադարը: Չնայած այս կապակցությամբ ասուլիսի ժամանակ Մերկելը հստակ դիրքորոշում չի արտահայտել, սակայն վերլուծաբանները նշում են, որ և՛ Եվրոպայի, և՛ ԱՄՆ-ի մոտ հստակ կարծիք է ձևավորվել, որ հակամարտությունը պետք է կարգավորել և այդ նպատակով նրանք պատրաստ են ճնշում գործադրել հակամարտության բոլոր կողմերի, այդ թվում՝ Պորոշենկոյի վրա:

Այն մասին, որ Բեռլինում Պորոշենկոյի համար բարդ բանակցություններ են եղել, վկայում է նաև այն, որ մամլո ասուլիսից հետո Պորոշենկոն խախտել է արարողակարգը` մոռանալով պարտադիր ձեռքսեղմման մասին: Մերկելը ստիպված  է եղել կանգնեցրել Ուկրաինայի հեռացող նախագահին, որպեսզի լուսանկարիչները դրոշների ֆոնին կարողանան արձանագրային լուսանկարներ անել: