Ահմադինեժադը նամակ է հղել Օբամային

• 09.08.2016, 14:35
•  Տարածաշրջան,  Մերձավոր Արևելք,  Աշխարհ

Sergey Guneev / RIA Novosti

Իրանի նախկին նախագահ Մահմուդ Ահմադինեժադը ԱՄՆ նախագահ Բարաք Օբամային առաջարկել է անհապաղ հարթել խնդիրը, որը ստեղծում է ԱՄՆ Գերագույն դատարանի որոշումը՝ ԱՄՆ-ում Իրանի ակտիվների անձեռնմխելիության համար: Այդ խնդրանքով նամակն ուղարկվել է Թեհրանում Շվեյցարիայի դեսպանատուն, որն Իրանում ներկայացնում է ԱՄՆ շահերին,մ հայտնում է  Fox News հեռուստաալիքը: 

ԱՄՆ Գերագույն դատարանը ապրիլի 20-ին որոշել է 2.65 միլիարդ դոլար փոխհատուցել 1983 թվականին Բեյրութում ԱՄՆ ծովային հետևակայինների զորանոցի մոտ հնչած պայթյունի հետևանքով զոհվածների հարազատներին: Այն ժամանակ զոհվել է ԱՄՆ 241 քաղաքացի: Փոխհատուցման վճարը նախատեսվում է իրականացնել նաև Իրանի Կենտրոնական բանկի 1.75 միլիարդ դոլարի միջոցներից, որոնք սառեցվել են և պահվում են Citibank-ում:

«Իրանի ժողովուրդն ակնկալում է, որ դուք արագորեն կհարթեք սեփականության կալանքի այդ կոնկրետ դեպքը, և ոչ միայն կվերականգնեք Իրանի ժողովրդի իրավունքները և կվերադարձնեք այդ սեփականությունը, այլև ամբողջովին կփոխհատուցեք պատճառված վնասը», - ասվում է նամակում:

Իր ուղերձում Ահմադինեժադն ուշադրություն է հրավիրում, որ իր առաջարկը ոչ մի կերպ չպետք է համարվի քաղաքական: