Հունգարիան և Սլովակիան կշարունակեն ընդդիմանալ ԵՄ որոշմանը

• 07.09.2017, 13:39
•  Եվրոպա,  Աշխարհ

REUTERS/Laszlo Balogh

ԵՄ դատարանը մերժել է Հունգարիայի և Սլովակիայի հայցերը, որով վերջիններս պահանջում էին չեղարկել ԵՄ երկրներում ներգաղթյալների վերաբաշխման քվոտան՝ պարտադրելով այս երկրներին ընդունել միգրանտներին: Նշենք, որ ըստ սահմանված քվոտայի Հունգարիան պետք է ապաստան տրամադրի 1294 միգրանտի, սակայն մինչ օրս ոչ մի միգրանտի չի ընդունել, իսկ Սլովակիան պետք է ընդուներ 902-ի, սակայն ընդունել է ընդամենը 16 փախստական: Սլովակիան և Հունգարիան իրենց հայցը հիմնավորում էին նրանով, որ փախստականների վերաբաշխման մասին որոշումն ընդունվել է գործող ընթացակարգի խախտումներով և ի զորու չէ կարգավորելու ԵՄ միգրացիոն ճգնաժամը: Սակայն, դատարանի որոշման մեջ ասվում է, որ ԵՄ օրենսդրությունը թույլ է տալիս արտակարգ իրավիճակներին արագ և արդյունավետ արձագանքելու համար ընդունել նախնական միջոցառումներ: Միևնույն ժամանակ Եվրոպական դատարանի գլխավոր փաստաբանն ընդգծում է այս միջոցառումների ակհայտ ժամանակավոր բնույթը, քանի որ դրանց իրականացման ժամկետները՝ 2015 թվականի սեպտեմբերի 25 - 2017 թվականի սեպտեմբերի  26, ամրագրված են փաստաթղթում:

«Այս որոշումը վտանգի տակ է դնում ամբողջ Եվրոպայի անվտանգությունը և ապագան», - այս կապակցությամբ նշել է Հունգարիայի արտաքին գործերի նախարար Պետեր Սիյարտոն՝ ընդգծելով, որ դատարանի որոշումն ընդունվել է ոչ թե իրավաբանական սկզբունքներով, այլ քաղաքական նկատառումներից ելնելով, և իրենք չեն պատրաստվում կատարել այն: Սլովակիայի վարչապետ Ռոբերտ Ֆիցոն իր հերթին նշել է, որ, չնայած ԵՄ դատարանի որոշմանը, իր երկրի դիրքորոշումն այս հարցում մնում է անփոփոխ:

Հիշեցնենք, Եվրոպայի խորհուրդը 2015 թվականին որոշում է ընդունել, որի համաձայն՝ Հունաստան և Իտալիա ժամանած 120 հազար միգրանտները պետք է վերաբաշխվեն ԵՄ անդամ բոլոր երկրներում: Ի դեպ, Եվրոպական հանձնաժողովի առաջարկի համաձայն, երկրները կարող են հրաժարվել քվոտաների համակարգից, սակայն այդ դեպքում պարտավոր են 250 հազար եվրո վճարել յուրաքանչյուր փախստականի համար, որին չեն ընդունել:

Հունգարիան, Սլովակիան, Չեխիան և Ռումինիան դեմ են հանդես եկել այս որոշմանը, իսկ Հունգարիան և Սլովակիան այս կապակցությամբ հայց են ներկայացրել Եվրոպական դատարան՝ պահանջելով որոշումը ճանաչել անվավեր:

Նշենք, որ այս որոշումը չկատարելու համար Եվրահանձնաժողովը Հունգարիայի և Սլովակիայի դեմ կարող է գործընթաց սկսել ԵՄ նորմերը խախտելու համար: