Հայ-վրացական սահմանը պետք է մնա համագործակցության և բարեկամության գոտի. Արմեն Աշոտյան

• 12.02.2018, 17:02
•  Տարածաշրջան,  Հայաստան

ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը փետրվարի 12-ին Թբիլիսիում հանդիպում է ունեցել Վրաստանի խորհրդարանի արտաքին հարաբերությունների հանձնաժողովի նախագահ Սոֆիո Կացարավայի հետ: Այս մասին հայտնում է ՀՀ ԱԺ լրատվական ծառայությունը:

Հանդիպմանը մասնակցել են նաև ՀՀ ԱԺ արտաքին հարաբերությունների մշտական հանձնաժողովի անդամներ Կարեն Բեքարյանը և Արարատ Զուրաբյանը:

Քննարկվել են երկկողմ օրակարգում առկա գերակայությունները, Հայաստանի և Վրաստանի խորհրդարանների միջև կապերի առավել ամրապնդման հնարավորությունները: Այս համատեքստում կարևորվել է միջազգային տարբեր հարթակներում համագործակցության ակտիվացումը, մասնավորապես փոխգործակցության աշխուժացումը ԵԽԽՎ և ԵԱՀԿ ԽՎ շրջանակներում:

Անդրադառնալով երկկողմ հարաբերությունների զարգացման հեռանկարներին՝ Արմեն Աշոտյանը նշել է, որ հայ-վրացական հարաբերությունները չպետք է կախված լինեն երրորդ կողմերի հետ հարաբերություններից: Այս համատեքստում հանձնաժողովի նախագահը հավելել է, որ հայ-վրացական սահմանը պետք է մնա համագործակցության և բարեկեցության գոտի:

Արմեն Աշոտյանը նշել է, որ հայկական կողմը մեծապես կարևորում է խորհրդարանական մակարդակում Վրաստանի հետ առավել համագործակցային հարաբերությունների խթանումը:

Կողմերը հանձնաժողովների մակարդակում հանդիպումներն առավել հաճախակի դարձնելու պատրաստակամություն են հայտնել, ինչը մի շարք առանցքային ոլորտներում փորձի փոխանակման խթան կհանդիսանա, մասնավորապես տնտեսական զարգացմանը, ժողովրդավարությանն ուղղված բարեփոխումներին, ԵՄ ինտեգրման ճանապարհին Վրաստանի ունեցած փորձին վերաբերող հարցերում: