Վենեսուելայի ոսկու պաշարներն այսուհետև վերամշակվելու են Թուրքիայում

• 19.07.2018, 18:40
•  Ամերիկա,  Տարածաշրջան,  Աշխարհ

Financial Times

Վենեսուելայի բնապահպանության և հանքարդյունաբերության նախարար Վիկտոր Կանոն հայտարարել է, որ իրենց երկրի ոսկու պաշարները ԱՄՆ-ի պատժամիջոցների պատճառով այսուհետև վերամշակվելու են ոչ թե Շվեյցարիայում, այլ Թուրքիայում, փոխանցում է «Ermenihaber»-ը: 

«Թուրքիայի և Վենեսուելայի կենտրոնական բանկերի միջև կնքվել է պայմանագիր։ Նման բան իրականացնում ենք դաշնակիցների հետ։  Ապա պատկերացրեք, եթե մեր ոսկիներն ԱՄՆ-ի պատժամիջոցների պայմաններում Շվեյցարիա ուղարկեինք և հանկարծ դրանք այնտեղ մնային, ի՞նչ էր լինելու»,- նշել է նախարարը։

Վերջինս ընդգծել է, որ ոսկու պաշարները վերամշակվելուց հետո հետ են ուղարկվելու Վենեսուելա։

Չի հրապարակվում, թե թուրքական որ ընկերություններում է լինելու վերամշակումը։

Աղբյուրը հիշեցնում է, որ նախորդ տարի Վենեսուելայում գրանցված մարդու իրավունքների խախտումներից հետո  ԱՄՆ-ն անցել էր տնտեսական պատժամիջոցների կիրառմանը։ Վենեսուելայի նախագահն այդ քայլը որակել է որպես պատերազմի հրահրում։