Իրանի նախագահն աշխարհի մուսուլմաններին կոչ է արել միավորվել ԱՄՆ-ի դեմ

• 25.11.2018, 16:36
•  Տարածաշրջան,  Աշխարհ

PRP Channel

Իրանի նախագահ Հասան Ռոհանին աշխարհի մուսուլմաններին կոչ է արել «հանցագործների առջև կարմիր գորգեր փռելու փոխարեն»՝ միավորվել ընդդեմ Միցայալ Նահանգների: Ռոհանին այս մասին ասել է մուսուլմանական աշխարհի միասնականության թեմայով Թեհրանում կայացած համաժողովի շրջանակում՝ ելույթ ունենալով պետական հեռուստաընկերության ուղիղ եթերում, փոխանցում է Daily Mail-ը:

«Արևմուտքին՝ ի դեմս ԱՄՆ-ի, ենթարկվելը կնշանակի դավաճանել մեր կրոնն ու այս տարածաշրջանում մեր սերունդների ապագան: Մենք պետք է ընտրություն կատարենք. կա՛մ կարմիր գորգեր փռենք հանցագործների առջև, կա՛մ ուժով կանգնենք անարդարության դեմ ու հավատարիմ մնանք մեր մարգարեին, մեր Ղուրանին ու մեր իսլամին»,- ասել է Իրանի նախագահը:

Ըստ Daily Mail-ի՝ Ռոհանիի կոչն ուղղված է եղել մասնավորապես Սաուդյան Արաբիային ու Պարսից ծոցի մյուս երկրներին, որոնք սերտ կապերի մեջ են ԱՄՆ-ի հետ:

«Մենք պատրաստ ենք պաշտպանել սաուդացի ժողովրդի շահերն ընդդեմ ահաբեկչության, ագրեսիայի ու գերտերությունների: Եվ մենք դրա համար 450 մլրդ դոլար չենք պահանջում»,- ասել է Ռոհանին՝ նկատի ունենալով Սաուդյան Արաբիայի ու Միացյալ Նահանգների միջև կնքված թանկարժեք պայմանագրերը: