Ուկրաինան Ռուսաստանի նկատմամբ նոր պատժամիջոցներ է պահանջում

• 04.12.2018, 17:41
•  Աշխարհ

EFE

Ռուս-ուկրաինական հակասությունները Սև Ծովում տեղի ունեցած միջադեպից հետո շարունակում են սրվել։ Ուկրաինան սահմանափակումներ է մտցրել 18-ից 60 տարեկան արական սեռի ՌԴ քաղաքացիների մուտքի համար, իսկ Գերագույն Ռադայում արդեն առաջարկներ են հնչում «Մագնիտսկու ցուցակի» օրինակով կազմել ՌԴ քաղաքացիների ցանկ, որոնց հանդեպ պետք է պատժամիջոցներ կիրառվեն՝ միջադեպի հետ առնչություն ունենալու համար։

Հիշեցնենք, որ նոյեմբերի 25-ին Կերչի նեղուցի մոտ միջադեպ է տեղի ունեցել ուկրաինական երեք նավերի և ռուսական կողմի մասնակցությամբ։ Ուկրաինական նավերը, ՌԴ պետական դիրքորոշմամբ, խախտել են ռուսական սահմանը և անօրինական կերպով մուտք գործել ՌԴ ծովային տարածք, չեն կատարել ռուսական կողմի պահանջները և արդյունքում ձերբակալվել են։ Ուկրաինական նավերից մեկը խոցվել է, նավաստիների մեջ կան վիրավորներ։ Ուկրաինական կողմը պնդում է, որ ռուսական կողմը հարձակվել է ուկրաինական նավահանգիստ ուղևորվող խաղաղ նավերի վրա։ Այժմ նավերի անձնակազմերի 24 նավաստիների նկատմամբ քրեական գործ է հարուցվել ՌԴ-ում, նրանց չեն վերադարձնում Ուկրաինային։

Այս միջադեպը մեծ միջազգային հնչեղություն է ստացել՝ նոր լարվածություն առաջացնելով Ուկրաինա-Ռուսաստան և Արևմուտք-Ռուսաստան հարաբերություններում։  Մի շարք հայտարարություններ են հնչել՝ քննադատող Ռուսաստանի կողմից ուժի կիրառումն ու նավերի ձերբակալումը, հարցը քննարկվել է նաև Արգենտինայում տեղի ունեցած Մեծ քսանյակի գագաթաժողովի կուլիսներում տեղի ունեցած հանդիպումների ընթացքում։ ՆԱՏՕ-ն, իր հերթին, մեծացրել է ներկայությունը Սև Ծովում 80-ից 120 օրով։

Ուկրաինական իշխանություններն ամեն ինչ անում են Արևմուտքի աջակցությունը ստանալու և Ռուսաստանի նկատմամբ ճնշում գործադրելու ուղղությամբ։ Մասնավորապես, այսօր Ուկրաինայի նախագահ Պյոտոր Պորոշենկոն հայտարարել է, որ Ուկրաինան պատրաստվում է ՄԱԿ-ի Միջազգային դատարան դիմել՝ պահանջելով ճանաչել Ռուսաստանի պատասխանատվությունը «Սև Ծովում տեղի ունեցած ագրեսիայի համար»։  Մինչ այդ Ուկրաինան արդեն իսկ դիմել է Միջազգային ծովային կազմակերպություն, Մարդու իրավունքների Եվրոպական դատարան, հրավիրել է ՆԱՏՕ-Ուկրաինա խորհրդի նիստ։ Իսկ ԱՄՆ նախագահ Դոնալդ Թրամփը չեղարկել է ՌԴ նախագահի հետ սպասվող հանդիպումն այս միջադեպի պատճառով։

Ռուսական կողմն, իր հերթին, պնդում է, որ սա նախապես ծրագրված սադրանք է, որի նպատակն էր արտակարգ իրավիճակ հայտարարել Ուկրաինայում և ազդել կայանալիք նախագահական ընտրությունների վրա՝ հաշվի առնելով գործող նախագահ Պորոշենկոյի ցածր վարկանիշը։

Չի բացառվում, որ ուկրաինական կողմը կփորձի օգտվել այս միջադեպից միջազգային հանրության ուշադրությունը հրավիրելու համար Կերչի կամուրջի կառուցումից հետո Ազովի և Սև ծովի, Կերչի նեղուցի տարածքում ստեղծված իրավիճակի, նեղուցի նկատմամբ ռուսական կողմի վերահսկողության աճի վրա։ Կամուրջի կառուցումը Կիևի ակնկալած կոշտ արձագանքը չստացավ միջազգային հանրության կողմից, Կիևը շարունակում է բողոքել ուկրաինական նավերի երթևեկության համար առաջացած խոչընդոտներից և սահմանափակումներից։