Ռուսաստանը հնարավոր ամեն բան կանի Ղարաբաղյան հակամարտությունը լուծելու համար. Զախարովա

• 26.12.2018, 19:17
•  Տարածաշրջան,  Աշխարհ,  Հայաստան

mid.ru

Ռուսաստանը հնարավոր ամեն բան կանի Ղարաբաղյան հակամարտությունը լուծելու համար, բայց ժամանակային խնդիր պետք չէ դնել։ Այսօր այս մասին ասել է ՌԴ արտգործնախարարության պաշտոնական ներկայացուցիչ Մարիա Զախարովան` պատասխանելով լրագրողի այն հարցին, թե հնարավո՞ր է արդյոք, որ Ղարաբաղյան հակամարտությունը 2019-ին լուծվի` հաշվի առնելով Բաքվի լավատեսությունն այս հարցում, փոխանցում է Սպուտնիկ Արմենիան: 

«Մենք ժամանակային խնդիր չենք դնում, միշտ կողմ ենք եղել շուտափույթ լուծմանը և բոլոր միջոցները կձեռնարկենք դրա համար»,- ավանդական ճեպազրույցի ժամանակ ասել է նա։

Զախարովան հստակ ժամկետ չի նշել, միայն ասել է, որ «պատմությունը երկար է, հակամարտությունը` երկարատև»։

«Բայց այն, ինչ կախված է ռուսական կողմից` և՛ որպես Մինսկի խմբի համանախագահ, և՛ որպես երկիր, որը Հայաստանի ու Ադրբեջանի հետ ընդհանուր պատմություն ու անցյալ ունի, անհրաժեշտ ամեն բան կանի»,- ավելացրել է Զախարովան։

Ավելի վաղ Ադրբեջանի արտգործնախարար Էլմար Մամեդյարովը հայտարարել էր, որ Բաքուն պատրաստ է Լեռնային Ղարաբաղի հայերին բարձր մակարդակով ինքնակառավարման իրավունք տալ։ Ադրբեջանցի նախարարը կարծում է, որ հակամարտության կարգավորումից հետո երկու համայնքները պետք է ապրեն միասին։