Ուկրաինա. Զելենսկին և Պորոշենկոն կշարունակեն պայքարը նախագահի պաշտոնի համար

• 01.04.2019, 19:35
•  Եվրոպա,  Աշխարհ

EMPICS

Ուկրաինայում նախագահական ընտրությունների երկրորդ փուլ են անցել դերասան Վլադիմիր Զելենսկին և գործող նախագահ Պյոտր Պորոշենկոն:

Ուկրաինայի Կենտրոնական ընտրական հանձնաժողովն արձանագրությունների 60 տոկոսի տվյալների հաշվումից հետո պաշտոնապես հայտարարել է, որ թեկնածուներից ոչ մեկն արդեն չի կարողանա հավաքել ընտրողների ձայների մեծամասնությունը: Երկրում կանցկացվի նախագահի ընտրությունների երկրորդ փուլ:

 «Ես ուշադրություն եմ դարձնում այն բանի վրա, որ լինելու է երկրորդ փուլ, ԿԸՀ-ի առջև ծառացած է շատ հավակնոտ խնդիր, որովհետև այն ժամանակահատվածը, որը կա վերջնական արդյունքների ամփոփման և ԿԸՀ-ի կողմից երկրորդ փուլի վերաբերյալ ապրիլի 21-ի քվեարկության նշանակման արձանագրության ստորագրման միջև, շատ ու շատ կարճ է»,- ապրիլի 1-ին կայացած բրիֆինգում հայտնել է ԿԸՀ-ի նախագահ Տատյանա Սլիպաչուկը:

Նախագահի պաշտոնի համար մրցապայքարը կշարունակեն շոումեն, «Ժողովրդի ծառա» կուսակցության առաջնորդ Վլադիմիր Զելենսկին և գործող նախագահ Պյոտր Պորոշենկոն: Քվեաթեթիկների երեք քառորդի մշակման արդյունքում Զելենսկին ստացել է ընտրողների ձայների 30,41 տոկոսը, իսկ Պորոշենկոն` 16,12 տոկոսը:

Պորոշենկոն և Զելենսկին արդեն պատրաստվում են ընտրությունների երկրորդ փուլին: Պորոշենկոն հայտարարել է, որ նախագահական ընտրությունների երկրորդ փուլից առաջ անպայման պետք է տեղի ունենան թեկնածուների բանավեճեր, ինչին Զելենսկին համաձայնել է:

Թեկնածուներ Յուլիա Տիմաշենկոն և Յուրի Բայկոն, ովքեր համապատասխանաբար 13,20 և 11,52 տոկոս ձայներով զբաղեցրել էին երրորդ և չորրորդ հորիզոնականները, չեն համաձայնել ընտրությունների նախնական արդյունքների հետ և հայտարարել են իրենց` երկրորդ փուլ անցնելու մասին:

Սակայն պետք է նշել, որ ԵԱՀԿ-ի Խորհրդարանական վեհաժողովի պատվավոր նախագահ Իլկա Կաներվան, ամփոփելով միջազգային դիտորդների աշխատանքի արդյունքները, նշել է, որ Ուկրաինայում ընտրություններն անցել են ազատ և համապատասխանել են ԵԱՀԿ չափորոշիչներին:

Ավելացնենք, որ մարտի 31-ին կայացած ընտրություններում մասնակցությունը կազմել է 63,52 տոկոս: