Նեթանյահուն հայտարարել է Գազայի զինյալների դեմ հարվածները շարունակելու մասին

• 06.05.2019, 16:01
•  Մերձավոր Արևելք,  Աշխարհ

AP: Abir Sultan/Pool

Իսրայելի վարչապետ Բենիամին Նեթանյահուն հայտնել է, որ Գազայի հատվածում պաղեստինցի զինյալների դեմ արշավն ավարտված չէ և հրեական պետությունը պատրաստվում է դրա շարունակությանը, տեղեկացնում է «ՌԻԱ Նովոստի»-ն։

Անցած գիշեր կողմերը դադարեցրել են հարվածների երկօրյա փոխանակումը, որը չորս իսրայելցու և քսանհինգ պաղեստինցու կյանք է խլել։

«Արշավն ավարտված չէ, այն պահանջում է համբերություն և խորաթափանցություն։ Մենք պատրասվում ենք շարունակել։ Մեր նպատակն է եղել և մնում խաղաղության և անվտանգության ապահովումը հարավի բնակիչների համար»,- ասվում է Նեթանյահուի հայտարարությունում։

Հրադադարի մասին պայմանավորվածությունները, որոնք ենթադրաբար ձեռք էին բերվել Եգիպտոսի միջնորդությամբ, մամլո ամփոփագրում չեն հիշատակվել։

Նեթանյահուի խոսքով՝ զինված դիմակայության հերթական փուլի ընթացքում պաղեստինցի զինյալներին ծանր վնաս է հասցվել։

«Վերջին երկու օրերին մենք մեծ ուժով հարվածել ենք ՀԱՄԱՍ-ին և «Իսլամական ջիհադին», ռմբակոծել ավելի քան 350 թիրախ, գրոհել ահաբեկչության առաջնորդների և ակտիվիստների վրա, փլուզել ահաբեկչական ամրությունները»,- ասել է նա։