ԵՄ-ն կարևորում է դատաիրավական համակարգի բարեփոխումների համապատասխանությունը ՀՀ Սահմանարդությանը

• 22.07.2019, 21:00
• Հասմիկ Վարդանյան
•  Եվրոպա,  «Հայացք» վերլուծական կենտրոն,  Աշխարհ,  Հայաստան

ՀՀ-ում Եվրոպական միության պատվիրակության ղեկավար, դեսպան Պյոտր Սվիտալսկին, ով ավարտում է իր առաքելությունը Հայաստանում, այսօր հանդես է եկել ամփոփիչ մամուլի ասուլիսով:

Հայաստան-ԵՄ հարաբերությունների՝ հասարակությանն ամենաշատ հետաքրքրող հարցի՝ վիզաների ազատականացման վերաբերյալ դեսպանն ասելիք չուներ: Սվիտալսկին արձանագրում է, որ Հայաստանը պետք է լցվի համբերությամբ և ջանքեր գործադրի: Օրակարգի մյուս կետերի հետ կապված դինամիկան ավելի դրական է:

Այսպես, 2018 թվականի հեղափոխությունից հետո Հայաստանի իշխանությունների և ԵՄ միջև որոշակի անհասկացվածություն կար՝ կապված Հայաստանին տրամադրվող ֆինանսական օգնության ծավալների հետ: Հայաստանի իշխանությունների մոտ որոշակի ակնկալիքներ կային, որ հեղափոխությունից հետո ԵՄ-ն զգալի կմեծացնի ֆինանսական աջակցությունը, սակայն Բրյուսելի համար միայն հեղափոխության փաստը բավարար չէր, անհրաժեշտ էին ժողովրդավարության զարգացման ապացույցներ, հստակ ծրագրեր, կոնկրետ ակնկալիքներ: Հաշվի առնելով, որ այս տարի Հայաստանին տրամադրվող ԵՄ ֆինանսական աջակցությունը կազմելու է 70 մլն եվրո, այն դեպքում, երբ նախորդ տարի այդ գումարը 35 մլն եվրո էր՝ կարելի  է ասել, որ Հայաստանն ու Եվրամիությունն այս հարցում հասկացել են միմյանց: Սվիտալսկու խոսքից կարելի ենթադրել, որ Եվրամիության համար որպես ժողովրդավարության առաջընթացի ցուցիչ են ծառայել 2018 թվականի դեկտեմբերին կայացած արտահերթ խորհրդարանական ընտրությունները: Դեսպանը նաև կարևորել է կոռուպցիայի դեմ պայքարի հարցում իշխանությունների մոտ առկա քաղաքական կամքը:

Հայաստան-ԵՄ հարաբերությունների ներկայիս օրակարգի մյուս կարևոր կետը դատաիրավական համակարգի բարեփոխումներն են: ՀՀ իշխանությունները ձգտում են ցույց տալ, որ միջազգային հանրությունն աջակցում է անցումային արդարադատություն և վեթինգ կիրառելու իրենց մտադրությանը: ԵՄ դեսպանը, իր խոսքում կարևորելով Հայաստանում դատաիրավական համակարգի բարեփոխումների իրականացումը, չի անդրադառնում անցումային արդարադատությանն ու վեթինգին՝ ընդգծելով, որ բարեփոխումները պետք է  իրականացվեն ՀՀ սահմանադրության և միջազգային ստանդարտներին համապատասխան: Ավելին, ԵՄ դեսպանն ընդգծել է, որ Եվրամիությունը պատրաստ է փորձագետներ, ֆինանսական և տեխնիկական աջակցություն տրամադրել, որպեսզի ուսումնասիրվի եվրոպական երկրների փորձն ու մշակվի Հայաստանի համար նախընտրելի մոդել:

Այսպիսով, կարելի է արձանագրել, որ ՀՀ-ԵՄ հարաբերություններում դրական դինամիկա կա Հայաստանին տրամադրվող ԵՄ ֆինանսական աջակցության մասով, սակայն այն պահպանելու և զարգացնելու համար Հայաստանից պահանջվելու է լուրջ և հետևողական աշխատանք՝ ժողովրդավարական բարեփոխումներ իրականացնելու և այդ հարցում ԵՄ հատկացրած ֆինանսավորումն արդյունավետ ծախսելու հարցում: Ինչ վերաբերում է դատաիրավական բարեփոխումներին, ապա ԵՄ պատրաստ է ֆինանսական, փորձագիտական աջակցություն տրամադրել դատաիրավական բարեփոխումների համար, որոնք կիրականացվեն ՀՀ սահմանադրության և միջազգային ստանդարտների համապատասխանությամբ: