Ավստրալիայի Ռայդ քաղաքի և Ստեփանակերտի միջև բարեկամական հարաբերությունների հաստատման մասին բանաձևն ընդունվեց

• 24.07.2019, 09:17
•  Այլ,  Աշխարհ,  ԼՂՀ

Արցախի ԱԳՆ-ն հայտարարություն է տարածել՝ ողջունելով Ավստրալիայի Ռայդ քաղաքի և Արցախի մայրաքաղաք Ստեփանակերտի միջև բարեկամական հարաբերություններ հաստատումը:

«Ողջունում ենք Ավստրալիայի Ռայդ քաղաքի քաղաքային խորհրդի կողմից Արցախի մայրաքաղաք Ստեփանակերտի հետ բարեկամական հարաբերություններ հաստատելու մասին բանաձևի միաձայն ընդունումը, որն իրավական հիմք է ապահովում երկու քաղաքների միջև մշակույթի, կրթության, տնտեսության և այլ ոլորտներում համագործակցության հաստատման և գործնական ծրագրերի իրականացման համար:

Հատկանշական է նաև, որ բանաձևն ընդունվել է արտաքին գործերի նախարար Մասիս Մայիլյանի գլխավորած Արցախի Հանրապետության պատվիրակության՝ Ավստրալիա կատարելիք այցի նախօրեին։ Այցի շրջանակներում նախատեսվում է նաև հանդիպում Ռայդի քաղաքային իշխանությունների հետ, որի ընթացքում կքննարկվեն համագործակցության հնարավորություններն ու հեռանկարային ուղղությունները: 

Երախտագիտություն ենք հայտնում բոլոր նրանց, ովքեր իրենց ներդրումն են ունեցել Ստեփանակերտի և Ռայդի միջև ամուր բարեկամական հարաբերությունների հաստատմանն ուղղված այս նախաձեռնության իրականացման գործում», - նշված է հայտարարության մեջ։