Իվան Ուրգանտի կազմակերպած «հայկական երեկոյի» հյուրերի թվում է եղել նաև Գարիկ Մարտիրոսյանը (ՏԵՍԱՆՅՈՒԹ)

• 20.10.2019, 11:17
•  Աշխարհ,  Հայաստան,  Սփյուռք,  No-politics

Ռուսական «Առաջին ալիքով» հեռարձակվող «Երեկոյան Ուրգանտ» հեռուստաշոուի հերթական թողարկման հյուրը եղել է ռուսաստանաբնակ հայտնի շոումեն, պրոդյուսեր Գարիկ Մարտիրոսյանը, հայտնում է Tert.am-ը:

Իվան Ուրգանտի խնդրանքով շոումենը մեկնաբանել է իր համատեղ լուսանկարը ՀՀ նախագահ Արմեն Սարգսյանի հետ՝ նրա իսկ նստավայրում: 

«Դու մի մտածիր, թե ամեն անգամ Երևան գալուց ինձ դիմավորում է Հայաստանի նախագահը: Ես պարոն Սարգսյանի հետ ծանոթ եմ մինչ նրա՝ նախագահ դառնալը: Եվ գալով Հայաստան՝ ես նրանից հրավեր ստացա այցելել նախագահական նստավայր: Մենք շատ լավ հանդիպում ունեցանք, և նա ինձ նվիրեց գլխարկ՝ Հայաստանի զինանշանով»,- պատմել է Գարիկ Մարտիրոսյանը:

Շոումենը հայտնել է, որ նա նման լուսանկար ունի նաև Ուկրաինայի նախագահի հետ, ինչպես նաև տեսանյութ, որում նա պարում է ՌԴ նախկին նախագահ, այժմ վարչապետ Դմիտրի Մեդվեդևի հետ:

Հաղորդավարը ցուցադրել է ևս մի լուսանկար, որում պատկերված են ՀՀ նախագահն ու ամերիկյան իրապատում շոուի աստղ Քիմ Քարդաշյանը: Նրանք խոսել են Քիմ Քարդաշյանի, նրա ամուսնու՝ ռեփեր Քանյե Ուեսթի մասին, որին, ինչպես շոումենն է նշել, հայերն ասում են՝ «մեր Քանյե Ուեսթը»:

Հաղորդմանը հյուրընկալվել է ևս մի հայ՝ սպորտային մարմնամարզության աշխարհի չեմպիոն Արթուր Դալալոյանը, որը եկել էր ընկերոջ՝ ռուս չեմպիոն Նիկիտա Նագորնիի հետ: