Միջնորդներն Ադրբեջանի և Թուրքիայի մոտ հետևողականորեն ամրապնդում են ամենաթողության զգացումը

• 06.10.2020, 20:00
• Հասմիկ Վարդանյան
•  Տարածաշրջան,  Աշխարհ,  Հայաստան,  ԼՂՀ

Ադրբեջանի զինված ուժերն այսօր կեսօրից լայնամասշտաբ գրոհ են սկսել արցախա-ադրբեջանական սահմանի հարավային ուղղությամբ, հրթիռակոծում են նաև Ստեփանակերտը՝ հերթական անգամ ցույց տալով, որ կրակը դադարեցնելու և բանակցությունները վերսկելու մասին միջազգային հանրության կոչերն իրենց համար որևէ նշանակություն չունեն, և Ադրբեջանին կառուցողականության դաշտ բերելու համար հարկավոր են ավելի վճռական քայլեր, քան ուղղակի կոչերը:

Սակայն այս պահին միջազգային հանրությունը, այդ թվում նաև ԵԱՀԿ Մինսկ խմբի համանախագահ երկրները նման քայլեր ձեռնարկելու համար բավարար կամք չեն դրսևորում, ավելին, նույնիսկ հայտարարությունների մակարդակով Ադրբեջանի կողմից Արցախի դեմ իրականացվող ագրեսիան և տարածաշրջանային անվտանգությունը հարցականի տակ դնելը հստակ գնահատականների չի արժանանում:

Հոկտեմբերի 5-ին ԵԱՀԿ Մինսկի խմբի համանախագահ երկրների՝ Ռուսաստանի Դաշնության, ԱՄՆ-ի և Ֆրանսիայի արտաքին քաղաքական գերատեսչությունների ղեկավարները հանդես են եկել համատեղ հայտարարությամբ, որը, ինչպես ավելի վաղ նախագահների մակարդակով արված հայտարարությունը, ամբողջությամբ և օբյեկտիվորեն չէր արտացոլում տարածաշրջանում ստեղծված իրավիճակը: Այն աչքի է ընկնում ինչպես հասցեականության բացակայությամբ, որն Ադրբեջանում ստեղծում է ամենաթողության զգացում, այնպես էլ ներկայիս ագրեսիայի որոշ էլեմենտների անտեսմամբ:

Մասնավորապես, նախարարների հայտարարության մեջ կրկին չկա անդրադարձ Թուրքիայի կողմից տարածաշրջան Սիրիայից և Լիբիայից վարձկաններ բերելու փաստին, ինչը բավականին վտանգավոր իրավիճակ է ստեղծում ոչ միայն Ղարաբաղյան հակամարտության գոտում, այլև ողջ տարածաշրջանում:

Ավելին, համանախագահ երկրներն իրենց մանդատն իրականացնելու հարցում դիմում են Մինսկի խմբի անդամ երկրների աջակցությանը: Հաշվի առնելով, որ Թուրքիան Մինսկի խմբի ամենաակտիվ և Ղարաբաղյան հակամարտության հարցում ամենաշահագրգիռ երկիրն է՝ հայտարարությունում նման ձևակերպման հասցեատեր առաջին հերթին ընկալվում է Թուրքիան, առավել ևս որ որևէ անդրադարձ չկա Թուրքիայի ներգրավվածությանը Արցախի դեմ ադրբեջանական հերթական ագրեսիային:

Եթե նույնիսկ համանախագահ երկրները փորձել են այսկերպ Թուրքիային բերել կառուցողականության դաշտ, ապա դա ոչ արդյունավետ ճանապարհ է, նման մոտեցումն էլ ավելի է մեծացնում Թուրքիայի ախորժակը: Թուրքիայի ԱԳ նախարարն այսօր Բաքվում շարունակել է Հայաստանի և Արցախի դեմ ռազմատենչ հռետորաբանությունը՝ հերթական անգամ ապացուցելով, որ կարգավորման հարցում այդ երկիրը չի կարող որևէ կառուցողական դերակատարում ունենալ:

Ընդ որում, հստակությու չկա հայտարարության մեջ ոչ միայն կողմերի գործողությունների և Թուրքիայի ապակառուցողական և ագրեսիվ ներգրավվածությանը տրվող գնահատականի մասով, այլ նաև կարգավորման սկզբունքների և փաստաթղթերի, որոնց հիման վրա կողմերին կոչ է արվում վերսկսել բանակցությունները: Սա թերևս նորություն է Մինսկի խմբի համանախագահ երկրների կողմից տարբեր մակարդակներով արվող հայտարարություններում: