Հայաստան ժամանած ռուս խաղաղապահները տեղափոխվել են Լեռնային Ղարաբաղում օպերացիայի տարածք

• 11.11.2020, 10:55
•  ԵԱՏՄ,  Աշխարհ,  Հայաստան,  ԼՂՀ

Հայաստանի Հանրապետություն ժամանած Ռուսաստանի խաղաղապահ ստորաբաժանման զինծառայողները տեղափոխվել են Լեռնային Ղարաբաղի հակամարտության գոտում հրադադարի ռեժիմի և ռազմական գործողությունների դադարեցման վերահսկման խնդիրների իրականացման տարածք, փոխանցում է News.am-ը:

«Ռազմական շարասյունները պետք է ավելի քան 250 կմ անցնեն և ռուսական դիտակետերով խաղաղապահ զորակազմը տեղակայեն ԼՂ շփման գծի և Լաչինի միջանցքի երկայնքով»,- ասված է հայտարարության մեջ:

Ավելի վաղ հաղորդվել էր, որ 20 Իլ-76 ինքնաթիռներով 15 առանձին խաղաղապահ բրիգադից ավելի քան 400 ռուս խաղաղապահ արդեն ժամանել է հակամարտության գոտի:

Նախարարությունում հիշեցրել են, որ Լեռնային Ղարաբաղի հակամարտության գոտում խաղաղապահ զորախումբ տեղակայելու համար կտեղափոխվի ընդհանուր 1960 զինծառայող, 90 զրահափոխադրիչ, 380 միավոր ավտոմեքենա և հատուկ տեխնիկա:

Ըստ ՌԴ ՊՆ-ի` զորախմբի առանցքը լինելու են Կենտրոնական ռազմական օկրուգի (խաղաղապահ)  15-րդ առանձին մոտոհրաձգային բրիգադի ստորաբաժանումները: Գերատեսչությունում նշում են, որ ռազմական գործողությունների դադարեցման մասին համաձայնագրերի պահպանման վերահսկման համար ԼՂ շփման գծի երկայնքով և Հայաստանն ու Լեռնային Ղարաբաղը կապող Լաչինի միջանցքով ռուսական դիտակետեր կտեղակայվեն: Խաղաղապահ օպերացիայի հրամանատարությունը տեղակայված կլինի Ստեփանակերտի տարածքում: