ԱՄՆ-ը դատապարտել է «Համասի» կողմից Իսրայելի հրթիռակոծությունը

• 12.05.2021, 12:11
•  Ամերիկա,  Մերձավոր Արևելք,  Աշխարհ

РИА Новости/Наталья Селиверстова

Սպիտակ տունը դատապարտել է «Համասի» կողմից Իսրայելի հրթիռակոծությունը և դեէսկալացիայի կոչ է արել: Սպիտակ տան մամուլի խոսնակ Ջեն Փսակին հայտնել է, որ նախագահ Ջո Բայդենին «ամեն օր» տեղեկացնում են Երուսաղեմում և Գազայի հատվածում տեղի ունեցող իրադարձությունների մասին:

«Նախորդ շաբաթվանից նա հանձնարարել է թիմին ակտիվորեն փոխգործակցել Իսրայելի և Պաղեստինի բարձրաստիճան ներկայացուցիչների հետ, ինչպես նաև ամբողջ Մերձավոր Արևելքի առաջնորդների հետ: Թիմը տալիս է հստակ և հետևողական տեղեկատվություն դեէսկալացիայի մասին և դա մեր հիմնական նպատակն է»,-ասել է Փսակին:

«Իսրայելի անվտանգությանը, նրա պաշտպանության օրինական իրավունքին աջակցելը հիմնարար իրավունք է, և մենք երբեք չենք հրաժարվի դրանից: Մենք դատապարտում ենք «Համաս»-ի և այլ ահաբեկչական խմբավորումների կողմից շարունակվող հրթիռակոծությունը, այդ թվում Երուսաղեմի ուղղությամբ: Մենք հանդես ենք գալիս ընդդեմ ծայրահեղականության, որը հանգեցրել է երկու համայնքներում բռնությունների»,-ասել է նա:

Փսակիի խոսքով, Բայդենի վարչակազմը կշարունակի ջանքերը՝ ուղղված դեէսկալացիային:

Նա ընդգծել է, որ Բայդենն աջակցում է երկու պետություն ստեղծելու ճանապարհով իսրայելա-պաղեստինյան հակամարտությունը լուծելու որոշմանը. «Դա միակ միջոցն է ապահովելու համար արդարություն և կայուն խաղաղություն, որից երկու ժողովուրդները փորձում են հասնել»: