Մենք չենք համարում, որ Լեռնային Ղարաբաղի կարգավիճակի հարցը լուծված է. ԱՄՆ դեսպան

• 15.09.2021, 15:10
•  Տարածաշրջան,  Աշխարհ,  ԼՂՀ

Չափազանց կարևոր է այն, ինչ տեղի է ունենում Սյունիքի մարզում, հատկապես Գորիս-Կապան ճանապարհին, այս առումով մենք միշտ շեշտել ենք, որ նոյեմբերի 9-ի հրադադարի հայտարարությունից հետո համապարփակ լուծման անհրաժեշտություն կա։ Այս մասին այսօր լրագրողներին ասել է Հայաստանում ԱՄՆ դեսպան Լին Թրեյսին։

«Հայաստանը և Ադրբեջանը պետք է կարողանան հասնել երկարատև խաղաղության։ Ուզում եմ ընդգծել, և արդեն մի քանի անգամ ասել եմ․ մենք չենք համարում, որ Լեռնային Ղարաբաղի կարգավիճակի հարցը լուծված է։ Մենք համապարփակ լուծման անհրաժեշտություն ենք տեսնում, որի համար պետք է ընթանան բանակցություններ, ինչը շատ կարևոր է՝ լուծելու առաջացող տարբեր լարվածությունները, որ հատկապես տեսնում ենք սահմանամերձ շրջաններում»,- ասել է Լին Թրեյսին։

Թրեյսին ընդգծել է, որ Մինսկի խմբի օրակարգում մնում է Լեռնային Ղարաբաղի կարգավիճակի հարցը։

«Սա է ամերիկյան քաղաքականության դիրքորոշումը»,- ասել է Թրեյսին։

Այսօր՝ Ժողավրդավարության միջազգային օրը, դեսպան Թրեյսին մասնակցել է Հայաստանում բարևարքության նախագծի գործարկման միջոցառմանը։ Այս նախագծի նպատակն է Հայաստանին օգնել կոռուպցիայի դեմ պայքարում։