Լավրով. Ռուսաստանը կնպաստի հայ-թուրքական և հայ-ադրբեջանական հարաբերությունների կարգավորմանը

• 22.04.2015, 18:50
•  Աշխարհ

Այսօր Ռուսաստանի Դաշնության արտաքին գործերի նախարար Սերգեյ Լավրովը հարցազրույց է տվել ռուսաստանյան մի շարք ռադիոկայանների:

«Լեռնային Ղարաբաղի հակամարտությունը հասունացել է և լուծման հնարավորություններ կան: Ռուսաստանն արել է և շարունակում է անել ավելին, քան որևե մեկն, այդ շատ բարդ, բայց իրականում լուծման ենթակա հարցը հանգուցալուծելու համար: Պարբերաբար շփվում ենք Հայաստանի և Ադրբեջանի արտգործնախարարների հետ: Մեր նախագահը նույնպես շարունակում է քննարկել այդ թեման Հայաստանի ու Ադրբեջանի ղեկավարների հետ իր շփումների ընթացքում: Առաջ շարժվելու համար փոխադարձաբար ընդունելի հիմք գտնելու հնարավորությունն առկա է, և ակնկալում են, որ ապագայում սպասվող շփումները, այդ թվում նաև՝ Երևանում, այդ հարցում առաջ շարժվելու հնարավորություն կտան: Իմ կարծիքով՝ այն արդեն գերհասունացել է»,- մասնավորապես նշել է Լավրովը: Իսկ ինչ վերաբերում է հայ-թուրքական հարաբերություններին, ապա ՌԴ արտգործնախարարը խոստացել է, որ Ռուսաստանը կնպաստի դրանց կարգավորմանը ևս և ամեն ինչ կանի հայ-թուրքական սահմանի բացմանն աջակցելու համար:

«Спутник», «Эхо Москвы» և «Говорит Москва» ռադիոկայաններին տրված հարցազրույցում Լավրովն անդրադարձել է նաև ռուս-ամերիկյան հարաբերություններին Իսլամական պետության դեմ պայքարի համատեքստում: «Շատ պատերազմներ եղան, այն էլ չհիմնավորված պատերազմներ, պատերազմներ, որ հակասում էին համապատասխան տարածաշրջաններում` Իրաքում, Լիբիայում, Սիրիայում կայունության պահպանմանը. Ամերիկացիները չեն ցանկանում խոստովանել, որ «Իսլամական պետություն»-ն ի հայտ է եկել այս երկրներում իրենց իսկ ծավալած գործողությունների արդյունքում»,- նկատել է Լավրովը, նշելով իր հիասթափությունն ԱՄՆ-ի վարած քաղաքականությունից: