Երիտասարդների բարեխոս Ս. Սարգսի տոնը կնշվի փետրվարի 8-ին. կմատուցվի պատարագ, կլինի քայլերթ և համերգ

• 17.01.2020, 11:07
•  Հայաստան

Armenpress.am

Ամենայն Հայոց Գարեգին Բ հայրապետի տնօրինությամբ Ս. Սարգիս զորավարի տոնը հռչակվել է Երիտասարդների օրհնության օր: Այս տարի այն կնշվի փետրվարի 8-ին: Ս. Սարգիս զորավարն ամենասիրված սրբերից է, և պատահական չէ, որ Ս. Մեսրոպ Մաշտոց վարդապետը նրա մասունքները բերում է Կարբի (Աշտարակի շրջան)՝ տեղում կառուցելով երանելու անունը կրող եկեղեցի:

Տոնին նախորդող գիշերը երիտասարդներն աղի բլիթ են ուտում, որի հետ կապում են իրենց փեսացուի կամ հարսնացուի երազահայտնությունը: Այդ օրվա հիշատակելի սովորություններից է փոխինդով մատուցարանը դնելը տան տանիքին կամ պատշգամբին և սպասելը Ս. Սարգիս զորավարի ձիու պայտի հետքին: Ըստ ավանդույթի` Ս. Սարգիսը պետք է հրեշտակների ուղեկցությամբ անցնի, և ում մատուցարանի մեջ դրված ալյուրի կամ փոխինդի մեջ թողնի մաքրություն, անաղարտություն խորհրդանշող իր սպիտակ ձիու պայտի հետքը, այդ տարի կիրականանա տվյալ հավատացյալի երազանքը: Երիտասարդները տոնի առթիվ միմյանց բացիկներ և քաղցրավենիք են նվիրում: Տոնի օրը Ս. Սարգիս Զորավարի անունը կրող եկեղեցիներում մատուցվում է Սուրբ Պատարագ, որից հետո կատարվում է երիտասարդների օրհնության կարգ:

Արարատյան Հայրապետական թեմից հայտնում են, որ այդ օրը նախատեսված են մի շարք միջոցառումներ: Սուրբ Սարգսի մասունքակիր աջը, ինչպես նաև Մատենադարանից՝ 17-րդ դարում այստեղ ընդօրինակված Ավետարանը կբերվի Սուրբ Սարգիս Առաջնորդանիստ եկեղեցի: Բոլոր հավատացյալները կարող են առավոտից մինչ երեկո գնալ եկեղեցի, խոնարհվել աջի առաջ և ստանալ սրբի բարեխոսությունը: Եկեղեցիներում կմատուցվի Ս. Պատարագ և կկատարվի երիտասարդների օրհնության կարգ:

Օրվա կարևոր միջոցառումներից է մեծ քայլերթը, որը նախատեսված է Ս. Սարգիս եկեղեցուց  դեպի Սիրահարների պուրակ: Կմասնակցեն բազմաթիվ հավատացյալներ, երիտասարդներ, զինվորականներ: Օրվա ավարտին Սիրահարների պուրակում կկայանա տոնական համերգ: