Վրաստանի ԱԳՆ-ն կոչ է արել ՌԴ-ին դուրս բերել զինված ուժերը երկրի «օկուպացված» տարածքներից

• 08.08.2022, 13:36
•  Տարածաշրջան,  Աշխարհ

Օգոստոսյան պատերազմի 14-րդ տարելիցի առնչությամբ Վրաստանի ԱԳՆ-ն կոչ է արել Ռուսաստանին «դադարեցնել անօրինական գործողությունները, իրագործել 2008 թվականի օգոստոսի 12-ի զինադադարի պայմանագիրը և դուրս բերել զինված ուժերը Վրաստանի օկուպացված տարածքներից», փոխանցում է Tert.am-ը։

«Օկուպացիայի 14-րդ տարելիցի դրությամբ Ռուսաստանն առաջվա պես չի իրագործում 2008 թվականի օգոստոսի 12-ի հրադադարի համաձայնագիրը, որը ստորագրվել է Եվրամիության միջնորդությամբ, և ընդլայնում է իր անօրինական վերահսկողությունը օկուպացված շրջաններում», - ասվում է Վրաստանի ԱԳՆ հայտարարության մեջ։

ԱԳՆ-ն նշում է, որ Ռուսաստանն իր գործողություններով «հարված է հասցնում անվտանգությանը, մարդու իրավունքներին և փորձում է մեկուսացնել օկուպացված տարածքներում ապրող մարդկանց Վրաստանի մնացած տարածքներից և միջազգային հանրությունից»։

Վրաստանի ԱԳՆ-ն կոչ է անում Մոսկվային փոխել օկուպացված տարածքները ճանաչելու անօրինական որոշումը, գրում է «Նովոստի-Գրուզիա» գործակալությունը։

«Մարդու հիմնարար իրավունքների կոպիտ խախտումը, էթնիկ խտրականությունը և հարյուր հազարավոր ներքին տեղահանվածների և փախստականների՝ Վրաստանի Աբխազիայի և Ցխինվալի շրջաններում իրենց տները վերադառնալու իրավունքի խախտումը շարունակում է մնալ Ռուսաստանի օկուպացիայի անօրինականության ծանր մարդասիրական բեռը»,- ասվում է հայտարարության մեջ։

ԱԳՆ-ն նշում է, որ այս տարիների ընթացքում Ռուսաստանը խոչընդոտում է միջազգային իրավապաշտպան կազմակերպությունների և ԵՄ դիտորդական առաքելության մուտքը Աբխազիա և Հարավային Օսիա ինքնահռչակ հանրապետություններ։

Վրաստանի ԱԳՆ-ն շնորհակալություն է հայտնում միջազգային հանրությանը երկրի ինքնիշխանությանն ու տարածքային ամբողջականությանը աջակցելու համար։

Միաժամանակ ԱԳՆ-ն հաստատում է ռուս-վրացական հակամարտության խաղաղ կարգավորման քաղաքականությունը՝ նշելով, որ պաշտոնական Թբիլիսիի գործողություններն ուղղված են օկուպացիայի գծով բաժանված հասարակությունների միջև վստահության վերականգնմանը և ընդհանուր եվրոպական ապագայի կերտմանը։