ԿԲ–ն վերաֆինանսավորման տոկոսադրույքի վերաբերյալ իր որոշման մասին կհայտարարի հունիսի 13–ին

ԿԲ–ն վերաֆինանսավորման տոկոսադրույքի վերաբերյալ իր որոշման մասին կհայտարարի վաղը` հունիսի 13–ին։ ՀՀ ԱԺ ֆինանսավարկային և բյուջետային հարցերի մշտական հանձնաժողովի արտահերթ նիստի ժամանակ այս մասին հայտարարեց ԿԲ նախագահ Մարտին Գալստյանը, փոխանցում է Sptunik-ը։

«Այսօր մեզ մոտ լռության օր է, որպեսզի ավելորդ ազդակներ չտանք շուկայի մասնակիցներին և հասարակությանը։ Վաղն արդեն մեր որոշումը կլինի։ Շատ կարևոր կրիտիկական կետին ենք հասել. երկու տարի բարձր գնաճ ունենալուց հետո մենք հիմա ունենք մի գնաճ, որը թիրախից ցածր է, որը հիմնականում պայմանավորված է ներմուծվող պարենային ապրանքների գնանկմամբ»,– հայտարարեց ԿԲ նախագահը։

Նրա խոսքով` հատկապես ծառայություների ոլորտում, որի դեպքում տասնյակ տարիներ գնաճ չի եղել, այժմ հակառակ պատկերն ունենք։

Պատճառը, ըստ Մարտին Գալստյանի, պահանջարկի ավելացումն է։

«Իսկ ինչպես գիտեք` ԿԲ հիմնական նպատակը պահանջարկի կառավարումն է։ Այս պարագայում տեսնում ենք, որ մայիսին 12–ամսյա գնաճը 1.3 տոկոս է կազմել։ Նման ոգևորող ցուցանիշներին զուգահեռ տեսնում ենք, որ տնտեսության մեջ ավելցուկային պահանջարկ կա»,– ավելացրեց նա։

ԿԲ նախագահի համոզմամբ` ստացվում է` մեր տնտեսական աճը, պահանջարկը շարունակում է լինել ավելի բարձր, քան մեր պոտենցիալն է։

Նշենք, որ Եվրասիական զարգացման բանկի կանխատեսմամբ` 2023 թվականի վերջին սպասվում է մոտ 2,5% գնաճ։ Տարվա մնացած ժամանակահատվածում գների աճը կարող է փոքր-ինչ ցածր լինել Կենտրոնական բանկի նպատակային նշաձողից:

Գների աճը զսպող հիմնական գործոններն են հայկական դրամի փոխարժեքի ամրապնդումն ու հումքային ապրանքների համաշխարհային գների նվազումը։ 2024-ի վերջին Հայաստանում կանխատեսվում է 3.3% գնաճ։

Հաշվի առնելով գնաճի կայուն դանդաղումը և սպառողական պահանջարկի աստիճանական կայունացումը` ԵԱԶԲ-ում չէին բացառել, որ Հայաստանի ԿԲ-ի հունիսին վերաֆինանսավորման տոկոսադրույքի իջեցում տեղի կունենա:

Վերաֆինանսավորման տոկոսադրույքը մինչև ընթացիկ տարվա վերջ կարող է իջնել մինչև 9%: