ՀՀ–ում կեղծվել են պատվաստման սերտիֆիկատներ և թեստեր. «Covid 19»–ի գործը դատարանում է

Sputnik. Հայաստանում «Covid 19»–ի կանխարգելման միջոցառումների գործընթացում արձանագրված կեղծիքների գործը 20 մեղադրյալով ուղարկվել է դատարան։ Տեղեկությունը հայտնում է ՀՀ քննչական կոմիտեի մամուլի ծառայությունը։

«Գործի նյութերով պարզվել է, որ 2 հիմնական հանցավոր մեխանիզմ է դրսևորվել։ Մի տարբերակում կեղծ սերտիֆիկատներ են պատրաստվել, իսկ մյուս դեպքում` Covid 19–ի կեղծ բացասական թեստեր են տրամադրվել։ Գործի շրջանակում հանրային քրեական հետապնդում է հարուցվել 44 անձի նկատմամբ, որոնցից 25-ը` բուժաշխատող»,– ասված է հաղորդագրությունում։

«Քննչական կոմիտեի տվյալներով՝ 2023թ. մայիսի 1-ի դրությամբ քննվել է ընդհանուր առմամբ նման 68 քրեական վարույթ (գործ)։

«Covid 19» համավարակի տարածման կանխարգելման միջոցառումների գործընթացում կատարված հանցագործությունների վերաբերյալ 41 քրեական վարույթով նախաքննությունը 2023թ. մայիսի 1-ի դրությամբ շարունակվել է, իսկ 8 քրեական վարույթ կարճվել է ռեաբիլիտացնող հիմքերով:

Նշենք, որ սա կորոնավիրուսային համավարակի շրջանակում առաջին գործը չէ։ Մյուս «Covid 19»–ի գործով հանրային քրեական հետապնդում էր հարուցվել Երևանի փոխքաղաքապետ Գևորգ Սիմոնյանի, «Մեդլայն կլինիկ» ՍՊԸ–ի տնօրեն Բաբկեն Շահումյանի, փոխտնօրեն Լիլիա Հովակիմյանի, ՀՀ ԱՆ «Թոքաբանության ազգային կենտրոն» ՓԲԸ–ի դեղակայուն բաժանմունքի վարիչի ու ևս 8 անձի նկատմամբ։

Գևորգ Սիմոնյանը մեղադրվում է 2020-2022թթ. (նա այդ ժամանակ ՀՀ առողջապահության փոխնախարարն էր. խմբ.) ընթացքում ծառայողական պարտականությունները չկատարելու մեջ, ինչի հետևանքով էական վնաս է հասցվել պետության օրինական շահերին։