2015-ը «Հայաստանի տարի» Մարսելում

• 04.04.2015, 12:16
•  Եվրոպա,  Սփյուռք

Հայոց ցեղասպանության 100-րդ տարելիցի կապակցությամբ 2015 թվականը Մարսելում  հայտարարվել է «Հայաստանի տարի», որի շրջանակներում քաղաքի տարածքային չորս մարմինների (նահանգապետարան, քաղաքապետարան, մարզպետարան և Մարսելի արվարձանների խորհուրդ) և ՀՀ սփյուռքի նախարարության համատեղ ուժերով կկազմակերպվեն մի շարք միջոցառումներ: Այս մասին հաղորդում է ՀՀ Սփյուռքի նախարարության մամլո ծառայությունը։ 

Նախաձեռնության նպատակն է Մարսելի և արվարձանների քաղաքապետերին, թաղապետերին անկախ նրանց քաղաքական պատկանելությունից համախմբել, ներկայացնել Հայաստանը, հայ ազգային մշակույթը, պատմությունը և օսմանյան կայսրության կողմից հայերի նկատմամբ իրականացված ոճրագործությունը:

Միջոցառումները կազմակերպելու նպատակով ստեղծվել է «Մարսել-Պրովանս-Հայաստան 2015» միությունը, որի կազմում ընդգրկված են հայազգի և ֆրանսիացի տարբեր ոլորտների հայտնի անհատներ, կուսակցությունների ներկայացուցիչներ:   

Նախատեսված է ընդգրկել արվարձարանային շուրջ երեսուն քաղաքներ և ծրագրվել են 2015թ. ընթացքում մի շարք միջոցառումներ, ցուցահանդեսներ, համերգներ:

ՀՀ սփյուռքի նախարարության աջակցությամբ ապրիլի 25-ին Մարսելի Բորսայի պալատում կկազմակերպի ֆրանս-հայկական գրքի փառատոնը, որի ժամանակ  կներկայացվի աշխարհահռչակ հայազգի շանսոնյե Շառլ Ազնավուրի մասին պատմող Ռիչարդ Ֆինդիկյանի «AZNAVOUR STORY 2015» կամ «Շառլ Ազնավուրը Պրովանսում» և «100-րդ տարելիցի ձիթենին» ֆիլմերի ցուցադրումը, կկազմակերպվեն հայազգի նկարիչների ցուցահանդեսներ, հանդիպում-քննարկումեր: