Ադրբեջանը փորձում է խոչընդոտել ԼՂՀ ընտրություններին միջազգային դիտորդների մասնակցությունը

• 11.04.2015, 11:53
•  Տարածաշրջան,  Աշխարհ

Ադրբեջանում քրեական գործ է հարուցվել Սլովակիայի խորհրդարանի նախկին խոսնակ Ֆրանտիշեկ Միկլոշկոյի դեմ: Բաքուն վերջինիս մեղադրում է «Ադրբեջանի տարածքային ամբողջականությունը» խախտելու մեջ: Նշենք, որ Սլովակիայի նախկին խոսնակը 2010թ. մայիսին որպես միջազգային դիտորդ ներկա է գտնվել ԼՂՀ ԱԺ ընտրություններում: Սլովակ քաղաքական գործիչը հետագայում ևս այցելել է Արցախ` աշխարհին ներկայացնելով ղարաբաղյան խնդրի էությունը: «Երբ ես դիտորդ էի ԼՂՀ ընտրություններում, հասկացա, որ Ղարաբաղը ժողովրդավարական երկիր է, որը թռիչքային զարգացում է ապահովել մարդու իրավունքների պաշտպանության ոլորտում»,- 2012թ.-ին ԼՂՀ հաջորդ այցից հետո հայտարարել էր Միկլոշկոն: Վերջինս նշել էր, որ Արցախը պետք է շարունակի զարգանալ նույն հունով: «Ղարաբաղը պետք է ամրապնդի հարաբերություններն այլ երկրների հետ` մշակույթի, կրթության, կրոնի ասպարեզում»,-նշել էր նա: Սլովակ գործիչն Արևմուտքին կոչ էր արել աջակցել Արցախին, քանի որ առանց դրա վերջինիս դժվար է ամրապնդել պետականությունն ու տնտեսությունը: «Այդ իմաստով Ղարաբաղը նման է Արևմտյան Բեռլինի, որը երբևէ չէր զարգանա առանց Արևմուտքի աջակցության», - նշել էր Միկլոշկոն` ընդգծելով ԼՂՀ-ում քրիստոնեական արժեքների առկայությունը: «Քրիստոնյա Եվրոպան մոռացել է այն արժեքները, որոնք հիշում են Ղարաբաղում»,-վկայել էր նա:

ԼՂՀ առաջին իսկ այցից հետո սլովակ գործիչը հայտնվել էր ադրբեջանական «սև ցուցակում»: Ադրբեջանական պաշտոնական աղբյուրները, տեղեկացնելով Միկլոշկոյի դեմ քրեական գործ հարուցելու փաստի մասին, որևէ կերպ չեն նշում, թե ինչու հենց այժմ վճռեցին նման գործընթաց մեկնարկել: Թվում է` պատճառն առաջիկա ԼՂՀ ԱԺ ընտրություններն են. նման քայլով Բաքուն պարզապես փորձում է «ահաբեկել» այն օտարերկրացիներին, ովքեր պատրաստակամություն են հայտնել որպես դիտորդ մասնակցել Արցախում խորհրդարանական ընտրություններին:

Առանձին քննարկման առարկա է, սակայն, նման քայլի արդյունավետությունը. ԼՂՀ այցելող ցանկացած անձ գրեթե մեքենայորեն հայտնվում է ադրբեջանական «սև ցուցակում», և մարդու համար, ում մուտքն արգելված է որևէ երկիր, հազիվ թե կարևոր լինի այդ երկրում իր դեմ հարուցված դատական գործընթացը: Ուստի Բաքվի այս քայլը կարելի է որակել որպես քարոզչություն, որի նպատակը պարզապես սեփական հանրությանը ցույց տալն է, թե իշխանությունների կողմից իրականացվում են «քայլեր» ԼՂՀ-ում ընտրությունների ընթացքին կամ դրանց շուրջ միջազգային արձագանքներին խոչընդոտելու ուղղությամբ: