Ռուսաստանը և ԱՄՆ-ը սպառազինությունների նո՞ր մրցավազք են սկսում Արևելյան Եվրոպայում

• 16.06.2015, 18:50
•  Եվրոպա,  Աշխարհ

Ռուսաստանն ԱՄՆ-ի կողմից Արևելյան Եվրոպայում ծանր զինտեխնիկա տեղակայելը կդիտարկի որպես Ռուսաստանի դեմ ուղղված «ամենաագրեսիվ քայլը» Սառը պատերազմի ավարտից հետո: Այս մասին հայտարարել է Ռուսաստանի պաշտպանության նախարարության ներկայացուցիչը՝ հավելելով, որ Ռուսաստանը շատ արագ կարձագանքի ԱՄՆ-ի ցանկացած քայլին՝ ուղղված Արևելյան Եվրոպայում ռազմական ռեսուրսների մեծացմանն՝ իր արևմտյան սահմանները ամրապնդելով զորքերի և զրահատեխնիկայի թվաքանակի ավելացմամբ: Այս մասին գրում է The Washington Post-ը՝ վկայակոչելով Ռուսաստանի պաշտպանության նախարարության ներկայացուցչին:  

Հիշեցնենք, որ հունիսի 13-ին ամերիկյան բարձրաստաիճան պաշտոնյան հայտնել էր, որ Պենտագոնը քննարկում է Արևելյան Եվրոպայի և Մերձբալթյան երկրներում ծանր հրետանի տեղակայելու հնարավորությունը՝ որպես տարածաշրջանում «ռուսական հնարավոր ագրեսիային» ենթադրյալ պատասխան: Սպիտակ տան պաշտոնական ներկայացուցիչ Ջոշ Էրնեստը երկուշաբթի հայտարարել է, որ Արևելյան Եվրոպա սպառազինություններ ուղարկելու հարցի քննարկումը գտնվում է սկզբնական փուլում: Նա նաև մեկնաբանել է ԱՄՆ-ի նման որոշումը՝ նշելով, որ ԱՄՆ-ը, ՆԱՏՕ-ի կանոնադրության համաձայն, ՆԱՏՕ-ի անդամ երկրների տարածքային ամբողջականությունը պահպանելու պարտավորություն ունի: Սակայն հարկ է նշել, որ ՆԱՏՕ-ում հերքում են Վաշինգտոնի այս նախաձեռնության հետ իրենց կապը: Այսպես, РИА Новости-ին դաշինքի ներկայացուցիչը հայտնել է, որ Արևելյան Եվրոպայում ծանր ռազմական տեխնիկա տեղակայելու ԱՄՆ նախաձեռնությունը ՆԱՏՕ-ին չի վերաբերում:

Ենթադրվում է, որ ԱՄՆ-ը ծանր զինտեխնիկան կուղարկի Լիտվա, Լատվիա, Էստոնիա, Լեհաստան, Ռումինիա, Բուլղարիա և, հավանաբար, Հունգարիա: Էստոնիան և Լեհաստանն արդեն ողջունել են ԱՄՆ-ի մտադրությունն իրենց տարածքում ռազմական ներկայությունն ընդլայնելու վերաբերյալ: Ընդհանրապես, հարկ է նշել, որ Արևելյան Եվրոպայի երկրները ուկրաինական հակամարտության համատեքստում պարբերաբար մտահոգություն են հայտնել իրենց նկատմամբ «ռուսական հնարավոր ագրեսիայի» հետ կապված՝ ՆԱՏՕ-ին խնդրելով ամրապնդել իրենց անվտանգությունը: Սակայն Հյուսիսատլանտյան դաշինքում առանձնակի քայլեր չեն ձեռնարկում այս ուղղությամբ: Փոխարենը, ստեղծված առիթից փորձում է օգտվել Վաշինգտոնը՝ մեծացնելով Արևելյան Եվրոպայում իր ազդեցությունը: Ամերիկյան ծանր զրահատեխնիկայի հայտնվելը արևելաեվրոպական և բալթյան երկրներում շահավետ է նաև վերջիններիս՝ ոչ միայն իրենց անվտանգության ապահովման, այլ նաև քաղաքական կշռի մեծացման տեսանկյունից: Չնայած այս երկրների որդեգրած արևմտամետ քաղաքականությանը՝ նրանց տնտեսությունը զգալիորեն կախված է մնում Ռուսաստանի հետ հարաբերություններից: Իսկ ամերիկյան ծանր զինտեխնիկայի հայտնվելն իրենց տարածքում, ըստ այդ երկրների, թույլ կտա Ռուսաստանի հետ հարաբերություններում հանդես գալ ավելի շահեկան դիրքերից:

Ավելացնենք, որ Արևելյան Եվրոպայում ամերիկյան ռազմական տեխնիկայի հայտնվելը պատմական իրադարձություն կարելի է համարել, քանի որ սառը պատերազմի ավարտից հետո ԱՄՆ-ը նախկին սոցիալիստական ճամբարի երկրներին նման ռազմական աջակցություն երբեք չէր ցուցաբերել: