Ուկրաինայի պետական ավիացիոն ծառայության ղեկավարը Սահակաշվիլիին դատարկախոս է անվանել

• 27.06.2015, 13:11
•  Եվրոպա,  Աշխարհ

Ուկրաինայի նախագահ Պյոտր Պորոշենկոն սպառնացել է հեռացնել պաշտոնից Պետական ավիացիոն ծառայության ղեկավար Դենիս Անտոնյուկին Օդեսայի  նահանգապետ Միխայիլ Սահակաշվիլիի հետ ունեցած սկանդալից հետո:

«Պետական ավիացիոն ծառայության գործունեության շուրջ կկատարվի ուսումնասիրություն, որից հետո ծառայության ղեկավար Դենիս Անտոնյուկը կհեռացվի պաշտոնից»,- գրել է Ուկրաինայի նախագահն իր ֆեյբուքյան էջում:

Ուկրաինայի պետական ավիացիոն ծառայության ղեկավարի և Սահակաշվիլիի միջև վիճաբանությունը տեղի է ունեցել Պետավիացիայի հանձնաժողովի նիստի ժամանակ, որն ուսումնասիրում է ուկրաինական խոշորագույն ավիաընկերությունների չվերթների թույլտվության հայտերը: Այս մասին հայտնում է РИА Новости-ն:

 Սահակաշվիլին հայտարարել է, որ կազմակերպության ղեկավարը պաշտպանում է օլիգարխների շահերը ՝ մեղադրելով  նրան կոռուպցիայի մեջ:

«Դուք աշխատավարձ ստանում եք կոնկրետ մարդկանցից: Որքա՞ն է Ձեր աշխատավարձը»,- հետաքրքրվել է նահանգապետը:

Դենիս Անտոնյուկը հայտնել է, որ ստանում է 5.5 հազար գրիվեն և կոչ է արել նահանգապետին վերջ դնել դատարկաբանությանը: Բացի այդ նա Սահակաշվիլիին հրավիրել է իր տուն՝ տեսնելու, թե ինչպես է ապրում, սակայն վերջինս մերժել է առաջարկը: