ԵՐԵՎԱՆ 5 C°
ՀՀ ԿԲ -
  • USD - 483.94 դրամ +0,94 EUR - 512.2 դրամ +0,2 RUB - 7.88 դրամ +0,88 GBP - 595.54 դրամ +0,54
  • ՈՍԿԻ - 24 465,11 դրամ ԱՐԾԱԹ - 275,22 դրամ ՊԼԱՏԻՆ - 15 080,54 դրամ

Մոլդովա. ցուցարարները չեն հանձնվում

Մոլդովայի մայրաքաղաք Քիշնևում այս օրերին թեժ հակակառավարական ցույցեր են տեղի ունենում, որոնք կազմակերպվել են DA «Արժանապատվություն և արդարություն» քաղաքացիական հարթակի կողմից: Ցուցարարները պահանջում են Մոլդովայի ամբողջ ղեկավարության հրաժարականը, այդ թվում՝ նախագահ Նիկոլայ Տիմոֆտիի, գլխավոր դատախազի, Ազգային բանկի նախագահի և այլն: Ցուցարարները պահանջում են նաև պետության ղեկավարի համաժողովրդական ընտրության և արտահերթ խորհրդարանական ընտրությունների անցկացում 2016 թվականի մարտից ոչ ուշ:

Բանն այն է, որ մոլդովացիները խիստ դժգոհ են կտրուկ գնաճից, որի պատճառն, ըստ իրենց, եղել է  անցյալ տարի բանկային համակարգում խարդախությունների արդյունքում պետբյուջեից շուրջ մեկ միլիարդ դոլարի յուրացումը:

Ուշագրավ է, որ երեկ`կիրակի օրը, Քիշնևի կենտրոնական հրապարակում տեղի է ունեցել Մոլդովայի պատմության մեջ երկրորդ ամենախոշոր հանրահավաքը, որին, ըստ պաշտոնական տվյալների, մասնակցել է ավելի քան 15 հազար մարդ:

Սակայն մասնակիցները մտադիր են ցույցեր կազմակերպել ոչ միայն Մոլդովայի մայրաքաղաքում, այլև բոլոր շրջաններում, ինչպես հանրահավաքի ժամանակ հայտնել է կազմակերպիչներից մեկը` խորհրդարանի նախկին պատգամավոր Վալենտին Դոլգանյուկը:

«Եթե իշխանությունները չեն լսում մեզ այստեղ՝ երկրի հենց սրտում, այնպես կանենք, որ ցույցերով կհրդեհվի ողջ երկիրը։ Հողը կայրվի ղեկավարների ոտքերի տակ, և նրանք կզգան, թե ինչ է նշանակում արթնացնել ժողովրդի զայրույթը»,– հայտարարել  է բորբոքված Դոլգանյուկն ` ավելացնելով, որ իրենց հարմարավետ աշխատասենյակներում նստած ղեկավարները շուտով չեն կարողանա որևէ տեղ դուրս գալ կամ որևէ մեկին հանդիպել։

Հիշեցնենք, որ սեպտեմբերի 8-ին Մոլդովիայի նախագահի վարչության ղեկավար Իոն Պեդուրարուն հայտարարել էր, որ երկրի ղեկավար Նիկոլայ Տիմոֆտին, չնայած Քիշնևի կենտրոնում բողոքողների պահանջներին` չի պատրաստվում հրաժարական տալ, քանի որ այդ պահանջը «տարօրինակ» և «անհիմն» է համարում: Բացի այդ, ըստ Պեդուրարուի`նախագահի հրաժարականը ո'չ երկրի, ո'չ էլ հասարակության շահերից չի բխում:

Սակայն ցուցարարները չեն հանձնվում և մտադիր են ուժեղացնել իշխանությունների վրա ճնշումը:

«Մենք վճռականորեն գնալու ենք մինչև վերջ՝ մինչև մեր բոլոր պահանջների կատարումը», - հայտարարել է DA հարթակի ակտիվիստներից Անդրեյ Նեստատեն, ով հայտարարություն է նախաձեռնել, որտեղ համընդհանուր գործադուլի կոչ է արվում:

 «Փաստաթուղթն ընդունվել է` հաշվի առնելով բոլոր սոցիալական խմբերի ներկայացուցիչների ցանկությունները», - շեշտել է Նեստատեն:

Ամեն դեպքում, այս բոլորի հետ կապված դեռևս որևէ լուրջ պաշտոնական արձագանք չի հնչել Եվրոպական միության բարձրաստիճան ղեկավարների կողմից։ Ստեղված իրավիճակը Մոլդովայում վկայում է այն մասին, որ երկրում աստիճանաբար կայանում է քաղաքացիական հասարակությունը, մյուս կողմից առկա ճգնաժամն ու դրա պատճառները ցույց են տալիս, որ ժողովրդավարության և թափանցիկության բավական բարձր ցուցիչները, որ գրանցվում են Մոլդովայի օգտին, իրական քաղաքականության մեջ այլ պատկեր են ներկայացնում։ Արևելյան գործընկերության առաջատարներից մեկը համարվող Մոլդովան ևս մեկ անգամ ցույց է տալիս ԵՄ այս քաղաքականության բարեփոխման և քաղաքական որոշումներն իրական հիմքերի վրա կառուցելու անհրաժեշտությունը։ 

այլ նյութեր այս թեմայով

այլ նյութեր այս թեմայով


Ամենաընթերցվածը

օրվա

շաբաթվա

ամսվա

Եղանակ
Երևան
Ամպամած
Խոնավություն՝ 75%
Քամի՝ 4 կմ/ժ
5 C°
 
   
22.02.2020
   
23.02.2020
Հարցում

Համաձա՞յն եք, որ Հայաստանում սահմանադրական փոփոխություններ տեղի ունենան: