Ինչո՞ւ են ԱՄՆ-ի հակառուսական պատժամիջոցներն անհագստացնում Եվրոպային

• 27.07.2017, 18:23
•  Եվրոպա,  Աշխարհ

ridus.ru

Սպիտակ տանն ակնկալում են, որ Ռուսաստանի, Իրանի և Հյուսիսային Կորեայի դեմ պատժամիջոցների ընդլայնման մասին օրինագծում կկատարվեն փոփոխություններ, և դրանից հետո միայն ԱՄՆ նախագահ Դոնալդ Թրամփը կկարողանա ընդունել այդ հաշվով վերջնական որոշում։ Այս մասին հայտարարել է Սպիտակ տան պաշտոնական ներկայացուցիչ Սառա Սանդերսը՝ փոխանցում է Интерфакс-ը։

Սանդերսը նշել է, որ Սպիտակ տունը, նախագահն ու ողջ վարչակազմն աջակցում են պատժամիջոցներին։ Ներկայացուցչների պալատը երեկ հավանություն էր տվել օրինագծին, այժմ հերթը Սենատինն է, որից հետո այն պետք է հաստատվի նախագահի կողմից։

Ընդունվելու դեպքում պատժամիջոցները կդառնան ամենալայնածավալը 2014 թվականից հետո։ Փաստաթղթում նաև պարունակվում է կետ, որը պարտավորեցնում է նախագահին նախապես համաձայնեցնել օրենսդիրների հետ պատժամիջոցների ցանկացած մեղմացում կամ չեղարկում։ Փորձագետնեն ակնկալում են, որ օրենսդիրները նման հնարավորությունը բաց չեն թողնի, և օրինագիծը կընդունվի առանց էական փոփոխությունների:

Նշենք, որ այս նոր փաստաթղթով ամերիկյան կոնգրեսը պատրաստվում է հարվածել առաջին հերթին Ռուսաստանի էներգետիկ սեկտորին՝ մասնավորապես «Հյուսիսային հոսք-2» նախագծին: Հիշեցնենք, որ այս նախագիծն ենթադրում է Բալթիկ ծովի հատակով Ռուսաստանից Գերմանիա գազատարի երկու ճյուղերի կառուցում:

Ամերիկյան օրենսդիրները մտավախություն են հայտնում է, որ այս նախագիծը սպառնում է Եվրոպայի էներգետիկ անվտանգությանը, և սպառնում են տուգանքներ սահմանել նախագծին մասնակցող եվրոպական ընկերությունների նկատմամբ: Հաշվի առնելով, որ եվրոպական գործընկերները ֆինանսավորում են նախագծի 50 տոկոսը՝ նրանց դուրս գալու դեպքում նախագծի իրականացումը լուրջ կասկածի տակ կհայտնվի:

Արդյունքում նման պատժամիջոցների հավանականությունը լուրջ մտահոգություն է առաջացրել ոչ միայն Ռուսաստանում, այլ նաև Եվրոպայում, մասնավորապես՝ Գերմանիայում, որտեղ «Հյուսիսային հոսք-2» նախագիծը դիտարկում են որպես էներգետիկ անվտանգության լրացուցիչ երաշխիք: ««Ամերիկան գերակա է ամեն ինչից» սկզբունքը չի կարող նշանակել, որ Եվրոպայի շահերը պետք է դրվեն վերջին տեղում», - հայտարարել է Եվրահանձնաժողովի նախագահ Ժան-Կլոդ Յունկերը՝ ընդգծելով, որ եթե Վաշինգտոնում հաշվի չառնեն Եվրոպայի մտավախություններն, իրենք պատասխան գործողությունների կարող են դիմել: Սակայն ԵՄ կողմից ԱՄՆ-ի դեմ լուրջ քայլեր հազիվ թե կարելի է ակնկալել, քանի որ այժմ Բրյուսելը չունի անհրաժեշտ քաղաքական և տնտեսական լծակներ Վաշինգտոնի վրա ազդելու համար: Իսկ Դոնալդ Թրամփի վարչակազմին այնքան էլ չեն հուզում եվրոպացիների զգացմունքները՝ երբ խոսքը հատկապես սեփական տնտեսական շահերի մասին է: ԱՄՆ-ը սկսել է Եվրոպա հեղուկացված գազի մատակարարումը և պատժամիջոցների միջոցով փորձում է ձերբազատվել հնարավոր մրցակիցներից:

Այսպիսով, պատժամիջոցների մի ԱՄՆ-ը առաջ է տանում իր տնտեսական հետաքրքրությունները՝ հարվածի տակ դնելով եվրոպական դաշնակիցների հետ հարաբերությունները: