Արցախ այցելած կոնգրեսականը որոշել է առաջադրել իր թեկնածությունը ԱՄՆ նախագահի պաշտոնում

• 12.01.2019, 20:23
•  Ամերիկա,  Աշխարհ,  ԼՂՀ

ԱՄՆ Ներկայացուցիչների պալատի դեմոկրատ անդամ Թուլսի Գաբարդը հայտարարել է, որ որոշել է 2020թ. ԱՄՆ նախագահ առաջադրվել, տեղեկացնում է ՌԲԿ-ն՝ հղում կատարելով CNN-ին։ Պաշտոնական հայտարարությունն այս հաշվով նա խոստացել է անել գալիք շաբաթ։

«Ես քիչ պատճառներ չունեմ այս որոշումն ընդունելու համար։ Կան շատ խնդիրներ, որոնց բախվում են ամերիկացիները, որոնք ինձ անհանգստացնում են և որոնց լուծմանն ուզում եմ օգնել»,- ասել է նա։ Նման խնդիրների շարքում նա թվարկել է բուժօգնության հասանելիությունը, իրավապահ համակարգի բարեփոխումը և եղանակի փոփոխությունը։ Կենտրոնական հարց նա համարել է «պատերազմի ու խաղաղության» խնդիրը։

37-ամյա Թուլսի Գաբարդը հայտնի է Մերձավոր Արևելքում ԱՄՆ քաղաքականության քննադատությամբ։ Թուլսի Գաբարդը հանդես է գալիս Հայոց ցեղասպանության ճանաչման օգտին, ինչպես նաև եղել է 2017թ. Հայաստան ու Արցախ այցելած կոնգրեսականների պատվիրակության կազմում, հայտնում է News.am-ը։

Գաբարդը զինծառայություն է անցել՝ որպես կամավորական ծառայելով Ազգային գվարդիայում։ 2004-2006թթ. ծառայել է Իրաքում, ավելի ուշ եղել է ռազմական ոստիկանության բրիգադում դասակի ու հատուկջոկատայինների բրիգադի հրամանատար։ Գաբարդը ԱՄՆ Ազգային գվարդիայի մայոր է։