Բաթումի 16-րդ միջազգային համաժողով. ԵՄ-ն դեռ պատրաստ չի ընդունել Վրաստանին

• 13.07.2019, 14:22
•  Եվրոպա,  Տարածաշրջան,  Աշխարհ

1TV

Հուլիսի 11-ին Վրաստանում մեկնարկեց Բաթումի 16-րդ միջազգային համաժողովը՝ նվիրված Արևելյան գործընկերության 10-ամյակին և վերջին տասնամյակում գրանցված ձեռքբերումների ամփոփմանը։ Համաժողովին բացման խոսքով հանդես եկան Վրաստանի արտաքին գործերի նախարար Դավիթ Զալկալիանին, Վրաստանի վարչապետ Մամուկա Բախտաձեն, ինչպես նաև երկրի նախագահ Սալոմե Զուրաբիշվիլին։ Եվրոպական խորհրդի անունից ելույթ ունեցավ նախագահ Դոնալդ Տուսկը։ Բաթումիի համաժողովին շուրջ 400 մարդ էր մասնակցում. Արևելյան գործընկերության ծրագրում ընդգրկված վեց երկրների, Եվրոպական երկրների ներկայացուցիչներ, դեսպաններ, գործարարներ:

Ի դեպ, համաժողովն ուղեկցվել է ակտիվիստների կազմակերպած բողոքի ակցիաներով: Ռուսաստանի նախագահ Վլադիմիր Պուտինի դիմանկարով մեծ պաստառն ակտիվիստները փռել են գետնին և քայլել վրայով:

Վրաստանի նախագահի հետ հանդիպմանը Դոնալդ Տուսկը անհիմն է անվանել ռուսական ավիաընկերությունների արգելքը՝ չվերթներ չկատարել Վրաստան: Իր ելույթում Դոնալդ Տուսկը, հիշեցնելով Ռուսաստանի նախագահ Վլադիմիր Պուտինի 2005թ. արված հայտարարությունը, թե նախկին Խորհրդային Միության փլուզումը դարաշրջանի աղետն էր, հակադարձել է. «Հիշում եք երևի, թե ինչպես 2005թ. Ռուսաստանի նախագահը հայտարարեց․«Ժամանակն է ընդունելու, որ Խորհրդային Միության կոլապսն այդ շրջանի մեծագույն սխալ էր»։ Եվ այսօր ես այս հարթակից ուզում եմ բարձրաձայն հայտարարել, որ Խորհրդային Միության կոլապսն ու փլուզումը շատ դրական երևույթ էր Վրաստանի, Լեհաստանի, Կենտրոնական և Արևելյան Եվրոպայի երկրների համար։ Եվ ես վստահ եմ, որ հենց Ռուսաստանի համար՝ նույնպես», - ասել է Դոնալդ Տուսկը:

Վրաստանի ղեկավարները, իրենց ելույթներում ընդգծելով եվրոպական ընտանիքի մաս դառնալու ձգտումները, ժողովրդավարական երկիր դառնալու ցանկությունը, անդրադարձել են Աբխազիայի ու Հարավային Օսիայի խնդրին: Եվրախորհրդի նախագահն ասել է, որ Եվրամիությանը Վրաստանի անդամակցելու հեռանկարի վերաբերյալ Եվրոպայում թերահավատություն կա։ Նա ասել է, որ ինքը խնդիր չունի, սակայն «անդամակցելու հարցը մեկ օրում չի որոշվում, դա որոշ ձեռքբերումների արդյունքում է լինում»։ Տուսկն ընդգծել է, որ Վրաստանում անվտանգության առումով մեծ խնդիրներ կան:

Վրաստանի նախագահ Սալոմե Զուրաբիշվիլին ասել է, որ երկրի ամբողջականությունը վերականգնելու համար Վրաստանը Եվրամիության օգնության, աջակցության կարիքն ունի: Զուրաբիշվիլին ասել է, որ Վրաստանը խաղաղասեր երկիր է, 2008թ. պատերազմից հետո էլ բարյացակամ հյուրընկալում են ռուսաստանցի զբոսաշրջիկներին: Վրաստանի վարչապետ Մամուկա Բախտաձեն նկատել է, թե չնայած երկրում ստեղծված բարենպաստ պայմաններին, Վրաստանը դեռ բախվում է օկուպացված տարածքներում մարդու իրավունքների խախտումների:

Տուսկը հայտարարել է, որ «Վրաստանը միշտ կարող է հույսը դնել Բրյուսելի վրա», սակայն միաժամանակ նշել է, որ Վրաստանում հանրությունը պետք է համերաշխություն փնտրի։ Տուսկն ասել է, որ ուժեր կան, որոնք ուզում են կիսել Վրաստանն ու վրացական հասարակությունը․«Ձեզ եմ դիմում․ ոչ ոքի թույլ մի՛ տվեք պառակտել ձեզ, միշտ միասնական եղեք որպես մի մեծ Եվրոպա», - հայտարարել է Տուսկն ու իր ելույթն ավարտել վրացերեն «Կեցցե ազատությունն ու անկախ Վրաստանն» արտահայտությամբ։

Ամփոփելով կարելի է ասել, որ չնայած Եվրամիության անդամ դառնալու Վրաստանի հույսերին ու ձգտումներին,  ԵՄ-ում դեռ պատրաստ չեն նրանց ընդունել, և Տուսկի մեսիջները հստակ էին այս առումով: