Թուրք-ադրբեջանական համատեղ ջանքերը կարող են արդյունքում Հայաստանին և Արցախին կանգնեցնել փաստի առաջ

• 22.09.2020, 19:44
• Հասմիկ Վարդանյան
•  Տարածաշրջան,  «Հայացք» վերլուծական կենտրոն,  Աշխարհ,  Հայաստան,  ԼՂՀ

Վերջին օրերին Ադրբեջանը զգալիորեն ակտիվացրել է Հայաստանի նկատմամբ տեղեկատվական, քարոզչական հարձակումը, որին անմասն չի մնում նաև Թուրքիան:

Թուրքիան տավուշյան դեպքերից հետո նույն աննախադեպ ինտենսիվությամբ շարունակում է Հայաստանի նկատմամբ իր ագրեսիվ հռետորաբանությունը՝ այդ թվում նաև Ադրբեջանին հրահրելով Հայաստանի և Արցախի նկատմամբ ռազմական ագրեսիայի:

Թուրքական այս քաղաքականությունը, իհարկե, Հայաստանին ստիպել է ավելի լրջորեն մոտենալ Հայաստանի համար Թուրքիայից բխող անվտանգային մշտական մարտահրավերին և վերանայել իր մասնակցությունը հակաթուրքական դաշինքներում: Սակայն այսօր, ինչպես ցույց տվեց վերջին օրերին Անկարայի հայտարարություններին պաշտոնական Երևանի արձագանքը, ավելի ճիշտ՝ դրա բացակայությունը, այս պահին մենք ուղղակի փորձում ենք ակտիվացնել հարաբերությունները հակաթուրքական դաշինքներում ներգրավված երկրների հետ, իսկ Թուրքիայի կողմից հնչող մեզ ուղղված սպառնալիքներին վերաբերմունքը շարունակում է մնալ ոչ ադեկվատ:

Բաքվի հիստերիային զուգահեռ վերջին օրերին մենք ունեցանք Հայաստանի դեմ, այդ թվում նաև ուժի և ուժի կիրառման սպառնալիք պարունակող հայտարարություններ Թուրքիայի նախագահի աշխատակազմի, արտաքին գործերի և պաշտպանության նախարարությունների մակարդակով: Հայաստանի կողմից այս հայտարարություններին տեսանելի համարժեք գործողություններ և քայլեր դեռևս չեն հետևել: Ինչ վերաբերում է դիվանագիտական խողովականերով հնարավոր արձագանքներին, ապա հաշվի առնելով Թուրքիայի կողմից հնչող մեղադրանքները և սպառնալիքները՝ միայն դիվանագիտական խողովակներով արձագանքը հնարավոր չէ համարել համարժեք:

Պաշտոնական Երևանը պետք է հնարավոր բոլոր առիթներով միջազգային հանրության ուշադրությունը հրավիրի Հարավային Կովկասում Թուրքիայի ապակառուցողականության և Հայաստանի նկատմամբ ուժի և ուժի կիրառման սպառնալիքներին: Ընդ որում, առանձնահատուկ կարևոր է Մինսկի խմբի արձագանքը, որի աշխատանքի կապակցությամբ Թուրքիան պարբերաբար դժգոհություն է հայտնում: Թուրքիան, հանդիսանալով  ԵԱՀԿ մինկի խմբի անդամ, սպառնում է Հայաստանի և Արցախի անվտանգությանը և Ղարաբաղյան հակամարտության գոտում մեծացնում է զինված էսկալացիայի հավանականությունը: Սակայն, ինչպես միջազգային հանրությունը, այնպես էլ Մինսկի խումբը և համանախագահությունը, չեն շտապում համարժեք գնահատականներ տալ Թուրքիայի գործողություններին, ինչն արդյունքում նպաստում է Ղարաբաղյան հակամարտության կարգավուման հարցում իր ազդեցությունն ու դերակատարումը մեծացնելուն ուղղված Թուրքիայի հետևողական քայլերին, որոնք լայն աջակցություն են ստանում Բաքվի կողմից:

Հայաստանն այս կապակցությամբ հայտարարում է, որ ինքը Թուրքիային չի ընկալում և չի կարող ընկալել որպես միջնորդ, սակայն եթե մենք ճիշտ ժամանակին ակտիվ քայլեր չձեռնարկենք, այս ուղղությամբ թուրք-ադրբեջանական համատեղ ջանքերը կարող են արդյունքում Հայաստանին և Արցախին կանգնեցնել փաստի առաջ: Դրա համար բավարար է նայել Թուրքիայի ձեռագիրը հարևան տարածաշրջաններում: